Eks bankero Lionel Capriles a fayesé

WILLEMSTAD.- Eks bankero i èks Presidente Direktor di Maduro & Curiel’s Bank, sr. Lionel Capriles, a fayesé ayera nochi den seno familiar. Esei EXTRA a haña konfirmashon di dje ayera nochi. Nos por a komprondé ku el a fayesé rondoná pa su sernan kerí. Ultimo añanan sr. Capriles su kurpa no tabata duna i esei tambe a pone ku e no tabata den e kondishon pa el a selebrá e 100 aniversario di MCB manera e lo tabata ke, pero a lo ménos por bisa ku el a mira e banko ku tantu el a stima yega e punto ei. Ku fayesimentu di sr. Capriles por bisa ku komunidat di Kòrsou ta pèrdè un dje personanan di mas karismátiko ku hamas a biba riba e baranka aki.

Den su periodo na kabes di e banko, pero mas bien komo bankero den komunidat hopi hende tabata tene kuenta ku su  ekspreshonnan. Ora ku “e bankero” papia su palabranan tabatin peso. Komo un persona oriundo di e sektor komersial bankario el a yega di anunsiá por ehèmpel ku nos ekonomia tabata riba “hantrèm”, pero den e mesun rosea a lansa ideanan kiko lo por a hasi pa “jumpstart” nos ekonomia e tempu ei. Un tempu e tabata na kabes di Kámara di Komersio di Kòrsou.

Pero banda dje kara di bankero, sr. Capriles tabatin e kara sosial informal tambe. E no tabatin mester sa bo nòmber. Si bo ta hende hòmber e ta yama bo “Paps” i bo ta hende muhé bo ta “Mams”. Por lo general Mamsnan tur tabata haña sunchi serka dje. I hopi di nos ta kòrd’e naturalmente pa su kara i aktonan sosial. Hopi organisashon i persona a benefisiá positivamente di esaki ya ku Capriles tabata semper preokupá pa esnan mas abou riba e trapi den komunidat. E tabata un yu di Kòrsou ku a kore na chikí den kayanan di Skalo, el a konosé hendenan di tur nivel den komunidat, pues su kurason tabatin un espasio spesial pa e grupo ménos privilegiá.

Ta di mas pa bisa ku Paps tabata un persona hopi sensitivo. Hopi biaha su lágrimanan a traishon’é i divulgá loke e tabata sinti paden. E por tabatin boka grandi, pero su kurason tabata chikí. Pero tin kosnan ku ta Lio so por a tribi na bisa nan, sea ku ta den serio òf di un manera chistoso.

Pero meskos ku hopi kos den bida, a yega un momentu kaminda el a pasa e batuta over pa Lionel “Chicu” Capriles pa dirigí e banko. Promé ku Chicu a asumí e funshon, Lionel tata a atvertí komunidat si ku “Chicu no ta Lio”. Den esaki e tabatin tur rason, ya ku Chicu tòg ta un persona mas reservá, aunke dinámiko.

Finalmente pa loke ta nos di prensa, en general tin di rekonosé ku sr. Capriles tabatin hopi apresio pa nos trabou. Prensa a hunga un ròl importante den éksito di sierto proyektonan ku el a lansa òf ku MCB a finansiá. Sin prensa hopi idea lo no a haña tantu akohida. I tin di rekonosé ku durante su reinado el a malkriá prensa un tiki tambe den e sentido positivo. Nos tabatin akseso kasi den forma ilimitá serka sr. Capriles i komo prensa nos a apresiá esei.

Di parti di Gerensia, Staf i Personal di EXTRA Productions NV nos ta ekstendé nos mas sinsero palabranan di kondolensia na famianan di sr. Lionel Capriles, prinsipalmente su kasá Judith, yunan Chicu i Michelle, i tambe na henter e famia di MCB ku awe ta di luto.

“Paps” tabata un plaser di konosé den e bida aki, pero nos lo topa.

Shalom!!

SHARE