Frumunan liber ta entamá kaso kontra di Kraamkliniek

WILLEMSTAD.- Frumunan liber establesé ta entamá huisio sumario kontra di Fundashon Duna Lus/Kraamkliniek p’e echo ku ta stroba nan di guia nan klientenan te na final pa duna lus den e klínika.
E organisashonnan interesá den e kaso aki CVV (Curaçaose Vereniging voor Verloskundigen) Fundashon BVZ, fundashon Belangen behartiging Verloskundige Zorg, a keda di shòk ku e karta di intimidashon ku e direktiva di Fundashon Duna Lus a manda pa personanan na estado (7 luna i mas) di e frumunan liber establesé.
Fundashon Duna Lus ta partisipá den e karta ku e klientenan/pashèntnan na estado lo keda atendé pa e frumunan ku e fundashon skohe na Kraamkliniek.
Pa 9 luna largu e frumu i e kliente a traha riba un relashon di konfiansa ku otro. Banda di esaki ta bin aserka ku un muhé ku ta ‘hoog zwanger’ esta den su estado di serka di haña yu, ta masha sensibel. I awor nan ta bin tende ku e frumu ku nan tin konfiansa kuné pa hopi luna, no ta esun ku ta bai yuda nan na momentu di duna lus. I motibu di esaki ta ku e frumunan konserní a nenga di firma un akuerdo di atmishon.
Pero no ta trata di un akuerdo, pero mas bien un karta, kaminda tin yen artíkulo komo instrumento ku tei mas bien pa saka e frumunan liber establesé for di Kraamkliniek. Dor di firma un kontrakt asina e frumu liber establesé ta bai kooperá pa eliminá e profeshon di frumu independiente na Kòrsou.
E frumunan ku ta establesé liber ta dispuesto na firma un akuerdo di kooperashon manera ta para den e statutonan di Fundashon Duna Lus. Den e akuerdo aki partidonan ta traha segun palabrashonnan, miéntras ku den e kontrakt di atmishon tin puntonan dudoso pone.
Kraamkliniek a lanta (i su pèrmit ta bisa esei) komo empresa fasilitado pa e frumunan ku ta establesé liber por guia nan klientenan durante di parto. Gobièrnu ta obligá na respetá e eskoho di frumu serka e muhé na estado, pa e momentu ku e tin di duna lus, konsekuentemente fasilitá e frumu aki (Uitspraak Hof van Europa dd 14-12-2010).
Kraamkliniek tin un posishon monopolio i 95% di partonan ta hasi pa frumunan Liber establesé den Kraamkliniek. Fundashon Duna Lus tin miéntras tantu 3 frumu den servisio komo konkurensia pa e frumunan liber establesé.
E situashon finansiero di Kraamkliniek ta dramátiko. Di mil kliente pa aña, nan no ta logra hasi ni 500 parto. I banda di esaki 60% di e partonan den Kraamkliniek ta keda hasí pa e frumunan liber establesé.
Ku e akshon aki, dor di tuma e pashèntnan pa nan so over, kaminda nan ta kobra e honorario, Kraamkliniek ke sera e buraku finansiero ku nan tin.
Segun e asosashon di frumunan, Kraamkliniek ta lubidá ku a base di nan posishon di monopolio nan ta violá e derechi di eskoho liber di e muhé na estado.
E frumu ta ehekutá su profeshon di forma independiente kual profeshon ta protehá pa lei.
Kraamkliniek ta eliminá banda di nan posishon di konkurensia, tambe e profeshon di e frumu liber establesé na Kòrsou pasobra den nan pakete di kuido di parto 95% di partonan ta sosodé den Kraamkliniek mes.
Riba e karta di fundashon Duna Lus/Kraamkliniek na klientenan di e frumunan liber establesé, tin reakshonnan fuerte di e klientenan. Tur ta para riba di ke sigui ku e frumu ku nan a skohe.
Awe djárason 11 di yanüari pa mitar di 2 di mèrdia lo tin un Huisio sumario den korte di e frumunan liber establesé kontra di Fundashon Duna Lus/Kraamkliniek.

SHARE