Fuikdag a bai hopi trankil

WILLEMSTAD. – Di parti Kuerpo Polisial, Fuikdag no tabatin nada di gravedat ku a tuma lugá. Di parti bishitantenan di Fuikdag ku tin mas di 20 aña ta bai Fuikdag tur aña di nobo, t’asina ku mester kustumbrá ku e Fuikdag nobo. Fuikdag no ta mas e loke e tabata. Polis tabata riba boto di Warda Kosta pa duna asistensia si esei tabata nesesario i tabata forma parti di e kontrol ku tabatin. Di parti di polis, e loke ku nan a atendé kuné, ta solamente algun intermediashon kaminda hende a bebe di mas i a forma problema. Tabatin asistensia den kaso di un boto ku a daña i hendenan ku a paga a rabia i eksigí nan sèn bèk.

Esaki ta un situashon ku a okurí den kareda di 3’or di mèrdia. Den e kaso aki, polis a intermediá pa kos no sali for di man. EXTRA tabatin kombersashon ku algun bishitante di Fuikdag ya pa mas di 20 aña i nan ta di opinion ku mester kustumbrá ku e ambiente di Fuikdag nobo. Ultimo 6 añanan Fuikdag a kue un dimenshon di un ambiente tur afó, kaminda ku tabatin un vlòt i tur kos tabata konsentrá rondó di e vlòt aki.

E último dos añanan i prinsipalmente e aña aki, Fuikdag no tabata bishitá manera otro añanan i e ambiente tabata plamá. Kada boto i yate tabata krea nan mes ambiente, ku nan músika i tambe ta tin boto ku a bin ku un “brass band” i a sòru pa un tremendo ambiente.

Pero tur yate i boto tabatin nan mes músika i esaki a pone ku no tabatin un sitio kaminda ku realmente tu hende tabata konsentrá. E ambiente tabata realmente plamá.  Pero e hendenan ku a bai, a pasa bon. Den kareda di 5’or pa 6’or  kasi tur boto ya a lòs i buska kaminda pa kas.

Polis a enfatisá ku en bèrdat no tabatin nada di gravedat. Tabatin polis riba boto di Warda Kosta pa duna asistensia kaminda ku esaki tabata nesesario.

Redakshon di EXTRA a trata di drenta den kontakto ku bosero di Warda Kosta, pero esei no a duna resultado.

SHARE