Kantidat di aksidente di tráfiko den 2016 a surpasá 13.000

WILLEMSTAD. – Konforme relato kòrtiku di Asosashon Tráfiko Sigur Kòrsou (ATSK), t’asina ku e kantidat di aksidente di tráfiko  a surpasá 13.000. Asina e sifranan preliminar di tráfiko pa aña 2016 ta revelá.

Segun Presidente di ATSK sr. Cristina, na aña 2010 e kantidat di aksidente a subi riba 10.000, na aña 2014 esaki a bula 12.000 i dos aña despues ku ta 2016 esaki a surpasá 13.000 aksidente registrá.

Den 2016 ATSK a registrá un kantidat di 13.496 aksidente ku ta un oumento di 14 % kompará ku 2015.

Di e 13.496 kantidat di aksidente di tráfiko registrá aki, Fundashon Kuido di Ambulans a transportá 541 persona pa poliklínika di Sehos di kua 341 tabata di e sekso maskulino i 200 di e sekso femenino. Kompará ku aña 2015 esaki ta un bahada di 10 %.

Kompará ku e otro lunanan di aña, desèmber ta keda e luna ku ta registrá mas aksidente.

Di e 541 persona ku Fundashon Kuido di Ambulans a transportá pa poliklínika, 199 a keda interná ku ta un bahada di 21% kompará ku aña pasá. Mayoria persona ku a keda transportá pa poliklínika ta den e edat di 20 pa 29 aña.

Kòrsou su tráfiko a eksihí 18 víktima di kua 13 tabata hende hòmber i 5 hende muhé. Mayoria víktima tabata shofùr. Velosidat haltu a hunga un ròl determinante den e aksidentenan ku morto komo konsekuensia. Mayoria aksidente ku fin fatal a tuma lugá riba djadumingu mèrdia pa bai kue anochi.

 

 

 

 

SHARE