Maria Liberia-Peters: Lucina da Costa Gomez tabata komprometé ku e kousa di emansipashon

WILLEMSTAD.- Eks-promé minister Maria Liberia-Peters ta di opinion ku Lucina da Costa Gomez tabata realmente komprometé ku kousa di emansipashon i desaroyo di pueblo di Kòrsou. E ta bisa esei den un análisis amplio riba e dirigente polítiko ku a bai sosegá den fin di siman na edat di 87 aña. Lo hiba sra. Da Gosta Gomez na su último lugá di sosiegu awe. Sra. Liberia-Peters ta bisa ku ta sra. Da Costa Gomez a konvens’é pa sirbi den polítika.

Un di aspektonan ku sra. Da Costa Gomez a traha riba dje ta emansipashon di pueblo, partikularmente di hende muhé. “Su kontaktonan direkto tantu na su kantor komo na Kas di Pueblo i den bario tabata sirbi pa haña feedback di loke tabata biba den kurason i mente di komunidat. Esei tabata forma base pa desishonnan pa yega na solushon.

Dunando oido na yamada di Nashonnan Uní pa eliminá tur forma di opstákulo ku ta stroba e hende muhé pa kontribuí na Desaroyo, Pas i Igualdat, Lucina a nombra un komishon ku a keda enkargá pa hasi un inventarisashon di tur nos leinan ku tabata diskriminatorio kontra di hende muhé.

Lucina a lucha den Konseho di Minister pa habri posibilidat pa hende muhé okupá trabounan ku te na e momentonan ei ta hende hòmber so por a okupá. Manera por ehèmpel polis, partido di karta, duanero, muhénan shofùr den transporte públiko, den imigrashon, wardadó di prezu, V.K.C./Muhénan den trabou di seguridat (bewaker i S.K.S), muhénan na Brantwer i awor tambe a konsekuensia di e maneho ei muhénan den “Kustwacht”.

Komo ku aspirantenan di polis mester a keda den internat na skol di polis i e akomodashon na Rio Canario no tabata duna espasio pa sekso miksto, Lucina a disidí di manda un grupo di 12 hende muhé Ulanda, kaminda nan a hasi e opleiding na Skol di Polis na Wageningen. Tur nos leinan tempunan aya, a sali for di un struktura kaminda ku e hende hòmber tabata sentral i tambe esun na kabes i responsabel pa famia.

Para ketu i realisá ku si Lucina no a pusha pa eliminá e lei ei, ningun hende muhé kasa pa studia ku bo por tabata, lo no tabatin e posibilidat di bira Hefe di Servisio, te pa nan a bira Gezaghebber o Gobernador. Lei tabata hasi e hende muhé kasá inkompetente pa aktua i tuma desishonnan ku konsekuensia hurídiko.

E korona riba kabes di Lucina ta dia Parlamento di Antia a aprobá e Landsverordening van de 7de mei 1975 tot opheffing van de handelingsonbekwaamheid van de gehuwde vrouw. (P.B. 1975 no. 70). E paso aki a marka un fundeshi sólido pa logra igualdat entre hende hòmber i hende muhé.

Den algun kaso a surgi konsekuensia i te hasta aktonan violento, dor ku sierto hende hòmber no por a traga e derechonan ku nan esposanan tabata atkerí. Kambio hopi biaha ta trese resistensia. P’esei Lucina a instituí tambe diferente servisio di sosten pa atendé problema familiar manera “Bureau voor Levens- en Gezinsmoeilijkheden”; un ofisina ekipá ku profeshonalnan manera sikólogo i trahadó sosial. Lucina a instituí tambe asina yamá Ofisina pa Bienestar, (Bureau Welzijnszorg) pa sigui traha riba maneho di bienestar i Vrouwenzaken pa yuda duna sosten na hende muhé riba kaminda pa logra mas formashon i desaroyo.

Despues ku Promé Minister Juan Gregorio Evertsz a tuma su retiro komo Promé Minister na 1977, sra. Lucina da Costa Gomez a huramentá serka Gobernador komo e Promé hende muhé pa okupá e funshon di Promé Minister. E okupashon a dura relativamente kòrtiku, ya ku e Gabinete nobo a keda enkabesá pa Sylvius (Boy) Rozendal.

Na prinsipio di añanan 80 a skrap 2 artíkulo hopi importante for di den L.M.A., e lei ku ta dikta privilegio i obligashon di empleadonan di gobièrnu.

artíkulo 92:- De gehuwde vrouw wordt op de dag van haar huwelijk ontslagen. (E muhé ku kasa ta keda retirá riba dia di su matrimonio).

artíkulo 93:- De ongehuwde vrouw die in konkubinaat leeft wordt ontslagen. (E hende muhé soltero ku bai biba den konkubinato tambe ta keda retirá)!

Esaki a pone ku hopi hende muhé no tabata apliká pa drenta servisio permanente (Vaste Dienst), pasobra si e tempu ei un hende muhé kasa denter di un periodo ménos ku 10 aña di trabou (dienstjaar), e tabata pèrdè e plakanan ku el a ‘stort’ den Fondo di Penshun di Amtenaar. Gobièrnu a sirbi komo trendsetter, pasobra kompanianan privá manera por ehèmpel Kompania Shell tambe a kuminsá permití hende muhé kasá okupá puestonan di hopi responsabilidat.

Lucina a dediká na inbertí hopi kontakto ku hende. E tabata berdaderamente komprometé ku e kousa di emansipashon i desaroyo di e pueblo di Kòrsou. Nos ta konfia ku awor ku Dios a yam’é, e Sosegá na pas.

Shon Lu, danki pa a konvensé mi di sirbi den polítika, i te Aweró”, asina e remarkenan di sra. Liberia ta bisa.

SHARE