SONA a bula Berenschot for di proyekto Hospital Nobo (update)

WILLEMSTAD.- Hospital Nobo Otrobanda ta sigui komo sentro di atenshon. E biaha aki pa motibu ku otro protagonista ta ekskluí. Den e kaso aki nos ta referí na e konsultent Berenschot. Den edishon di awe di EXTRA, SONA a emití un aviso den kual e ta splika ku Berenschot ya no ta forma parti di e proyekto. SONA a splika ku na 2013 a kumbiní ku Berenschot pa kontra un porsentahe fiho (fixed fee) e kaba e proyekto di Hospital Nobo pa pueblo di Kòrsou pa 1 di yanüari 2017. Sinembargo e hospital no ta kla ainda, i pa evitá gastunan adishonal i/of claim sin ta na nodi, SONA a disidí pa e mes kontinuá ku e trabounan di ehekushon i pa manehá e kontrakt.

Esaki ta nifiká ku entrante 1 di yanüari 2017 Berenschot no ta outorisá mas pa fungi komo organisashon di ehekushon pa SONA.

T’asina ku algun luna pasa Minister di Salubridat a anunsiá ku lo bini un evaluashon riba e proyekto aki, i por konsiderá ku a lo ménos tin un promé evaluashon a ser hasi. Tambe a anunsiá e posibilidat di envolvimentu di un grupo Belga. Lo tabatin presentashon di e grupo di Bèlgika. No ta konosí kiko presis tabata e kontenido di nan presentashon naturalmente, pero si ku den futuro nan lo por bai tin un ròl importante den e totalidat ya ku gobièrnu no tabata muchu kontentu ku e manera kon kosnan a bai via di SONA. Gobièrnu ta sinti ku tin falta di transparensia di parti di SONA. E último aki no tabata duna kuenta i rason dje aktividat i desaroyonan rondó di e proyekto manera a palabra ni manera ta spera di nan. E grupo Belga aki lo a bai fungi komo un sorto di intermediario pa pidi kuenta i rason kaminda esei ta nesesario.

Diskushonnan rondó di HNO nunka a duna e proyekto aki sosiegu. E kontratista Ballast Nedam ku for di un prinsipio a kuminsá ku e konstrukshon mester a sede pa un otro grupo despues ku e kompania madre na Europa a bati bankarota i a ser tuma over dor di un grupo Turko. Asta gerensia di e kompania ku tabata establesé na Kòrsou a ser retirá.

Mayoria parti dje diskushonnan ta rondó dje kosto total di e instituto aki ku ta kana den miones di dòler. Tabatin un tiki konfushon rondó di esaki ya ku di parti di gobièrnu i SONA a ser bisa ku e proyekto lo kana denter dje presupuesto ku tin, pero di otro banda Ballast Nedam a parker un ‘claim’ di mas ku 30 mion florin pa tardansa ku a surgi den e proyekto.

SHARE