Tres sospechoso detené den morto fatal di tio i subrino Rimon

WILLEMSTAD./ HELLEVOETSLUIS.- Na e momentu aki tin tres sospechoso detené den likidashon di Tio i subrino Rimon dia 26 desèmber último. Mañan 5 di yanüari lo tin entiero di Shurandly alias Machu na Ulanda. Esun promé ku a entregá ta un tal Bob K. di 29 aña di Hellevoetsluis. Dia 30 di desèmber Bob a entregá su mes na polisnan di Dordrecht. Djamars anochi tabatin otro edishon di “Opsporing  Verzocht”. Den e programa di televishon kondusí pa  kuerpo polisial di Ulanda, a para ketu riba e likidashon di Shurandly (29) i Faichel (22) Rimon i a hasi yamada na búskeda di sobrá sospechosonan ku ta metí den e kaso aki. Djis despues di a programa, a mèldu ku un di tres sospechoso ku a entregá su mes na polis. Ta trata di un hòmber di 23 aña. Djaluna polisnan a detené un hòmber di 50 aña di Hellevoetsluis. E hòmber aki tambe ta un sospechoso ku huntu ku tres otro hòmber mas a kometé e krímen di dòbel asesinato riba di dos dia di Pasku. Ainda falta un hòmber pa detené i ya kaba esaki ta señalá internashonalmente. Hasta polisnan tin su nòmber tambe.

E promé sospechoso ku a entregá su mes Bob K. di 29 aña a kore bai den e Dodge Ram ku despues a bin enkontrá riba un lugá di stashoná outo na Pieter Postplein. Polis ta hasi yamada na tur testigu ku por a mira ken a pone e vehíkulo na e sitio, i a sali for di dje. Tur esaki ta pa mira si e ta kuadra ku deklarashon dje sospechoso. Tambe polisnan den e programa di “Opsporing Verzocht” ta papia di un problema ku tabatin den Kerkstraat un ratu promé. Den e kaya aki den Hellevoetsluis, den kareda di 2.07 di mardugá di 25 pa 26 desèmber tabatin un problema entre algun hende. Segun polisnan, posiblemente e problema aki tin di aber ku e tiroteo fatal ku a tuma lugá despues unda a basha bala riba Faichel i Churandly Rimon. Atrobe polis ta pidi pa testigunan ku a mira loke a pasa na Alpen Express pa bin dilanti i duna nan tep na polis pa por solushoná e kaso.

E kaso aki sigur ta halando atenshon na Ulanda i di medionan.

Tata di Bob K. a papia na momentu ku su yu a entrega, bisando ku e yu no ta den nada. E yu a haña telefòn pa bai yuda kalma problema. Pasobra esei e sa hasi hopi biaha. Ora di tiroteo, e yu a para na banda, i a kore bai ku e Dodge Ram. Segun e tata te yu so a bai den e vehíkulo na e sitio i ora di hui bai for di e lugá, tambe e so tabata den e vehíkulo. Tin 20 reshèrshi trahando riba e kaso aki. Ainda falta un sospechoso pa detené. Manera ariba indiká, mañan 5 yanüari lo ta entiero di Shurandly.

SHARE