Mioselly i Terrence a skor den kompetensia ‘Maramentu di Lensu’

WILLEMSTAD.- Tremendo ambiente tabatin ayera fo’i mèrdia na Rust & Burgh kaminda Fundashon Kultural Seú Kòrsou a organisá e kompetensia di ‘Maramentu di Lensu’.
‘DEN E BEMBE’ a disfrutá dje atardi kaminda muzik i henter e ambiente kultural a sòru pa e públiko presente sinta relahá i gosa dje ambiente.
Pa loke ta trata e kompetensia di ‘Maramentu di Lensu’ 4 sekshon di partisipashon, ‘Lensu Kreativo’; ‘Lensu Amstel’; ‘Lensu Prensa’ i por último e kompetensia di ganadónan ku a yega di gana e kompetensia di maramentu di lensu den pasado i ayera a partisipá den ‘Ganadónan Lensu Kreativo’.

PREMIASHON
Premio Estímulo a bai pa Gigiola Leolina. E ganadó di nòmber skèrpi pa lensu a bai pa Mioselly Offerman ku e nòmber “Hiba trese, kuch’i dos banda bo ta”.
Lensu Kreativo: Segundo finalista, Rosemarie Cijntje ku e lensu ‘Bekita Dams’; Promé finalista, Maruta Arrindell ku e lensu ‘Ta nos ta Seú’ i ganadó lensu kreativo a resultá Terrence Selassa ku ‘Kashaka a bòltu’.
Lensu Amstel: Segundo finalista, Liliandra Monte ku ‘Purb’e pa bo sa’; Promé finalista Terrence Selassa ku ‘Daila di mi so’ i ganadó, Mioselly Offerman ku ‘Ta ken di mi por sin bo’.
Lensu Prensa: Segundo finalista, Terrence Selassa ku ‘Djaka Sambue, ku bamba’; Promé finalista, Rosemarie Cijntje ku ‘Sinta Mira’ i ganadó, Mioselly Offerman ku ‘Hiba trese, kuch’i dos banda bo ta’.
Ganadónan Lensu Kreativo: esaki tabata e sekshon pa partisipantenan ku den pasado a yega di gana e kompetensia di Lensu Kreativo i ku ayera a partisipá den un sekshon apart. E segundo finalista a resultá Lisandro Sofia ku e lensu ‘Homenahe na nos ansestronan ku a planta un bon siman aki riba nos Pais’; premio pa promé finalista a bai pa Admaida Sellasa ku su lensu ‘Sunu a bisti Rey’ i e ganadó apsoluto a resultá Ashley Statia ku e lensu ‘Hinka tur den koko, pa mi no bisa bo bai den ….’.
Fundashon Kultural Seú Kòrsou por mira atras riba un evento eksitoso. Pabien na e ganadónan.

SHARE