Situashon di Farándula ta “Pèrèmpèmpèn”

WILLEMSTAD.- E solo echo ku lo no tin niun dje konsiertonan grandi pa 2017 ta bolbe tira un lus riba nos farándula lokal ku tambe no ta den su mihó momentunan.
E situashon sosio ekonómiko ta pone ku fiestanan tambe a baha man formal i bandanan ta presentando 1 òf 2 biaha pa luna riba fechanan ku ta serka di fin di luna. Riba otro fechanan ta un rísiko grandi pa kualke promotor o banda organisá un fiesta sabiendo ku no fásilmente e ta sali for di su gastunan.
Den e área di ‘entertainment band’ e kos ta kanando un tiki mas mihó, pasó e bandanan chikí ounke nan ta ofresé tin biaha dilnan ‘to good to be true’ pa presentá, ta logra tòg di haña algun presentashon.
Un parti si ku tin problema kuné ta esun kaminda ‘entertainernan – solista’ ta presentá. Ta fresku den nos memoria kon aña pasa AMAK a hasi menshon dje echo ku tin algun músiko internashonal ku ta drenta Kòrsou i ta bai hasi presentashon “privá” i tin biaha te hasta komersial kaminda nan ta stroba músikonan lokal di haña un oportunidat pa presentá.

‘DEN E BEMBE’ a komprondé ku AMAK i su inspektornan, esnan enkargá ku kontrol, a kuminsá ta pone mas atenshon na e situashon aki i ku nan lo ta pendiente pa denunsiá tur e situashonnan apnormal i kontra di lei ku nan enkontrá.
‘DEN E BEMBE’ a tende di un situashon ku te hasta kantantenan di paisnan bisiña ta wòrdu kontratá pa bin presentá durante di nochinan di ‘karaoke’, kaminda ta paga nan kontra di pago.
Nos ta spera ku awor si AMAK i su inspektornan kuminsá move pa dje forma ei por frena e situashon ku ta menasando di kita pan di músikonan lokal.

SHARE