Situashon di koriente ta keda delikado: 4 mashin for di operashon i mulinanan a produsí ménos awe

WILLEMSTAD – Aqualectra 2 siman pasá a atvertí tokante situashon di koriente ku esaki ta delikado, debí ku 4 mashin(total di 30 MW) di produkshon di koriente ta for di operashon pa diferente motibunan tékniko. Miéntras tantu a pone un mashin den operashon i mester a saka un otro pa motibu di trabounan di mantenshon i pa otro siman ta bèk den operashon. I un mashin miéntras tantu a bai Fransia pa hasi trabounan di reparashon. Apesar ku último lunanan a logra mantené suministro optimal, sin mester a apliká e programa di skakel, e situashon aktual no ta ekskluí esaki.

Gerensia di antemano ke pidi komprenshon dado kaso tòg bira nesesario pa apliká e programa di skakel den oranan di pik.

Último tempu e demanda aktual, ku ta mas haltu ku histórikamente den e temporada aki, i p’esei Aqualectra ta konsiderá e situashon di suministro delikado. Esaki teniendo kuenta ku awe mulinanan di bientu ta produsí 7 MW ménos kompará ku ayera i ku chèns ku bientu por kai afó kompleto un ora pa otro, ku chèns ku por surgi skarsedat. Aqualectra den e kuadro aki ta den estrecho komunikashon ku CRU (BOO) pa koordiná nan suministro na e ret di Aqualectra.

Personal di Aqualectra tékniko den su totalidat ta hasiendo tur e esfuerso nesesario pa atendé e situashon di e mashinnan i  pa normalisá e situashon di koriente aki mas lihé posibel.

 

SHARE