KHAZER, IRAK. AP.- Un general irakí destaká a hasi un yamada djárason na gruponan irakí pa lucha kontra e grupo Estado Islámiko na Mosul pa nan rindi, na e terser dia di e gran operashon pa retomá e siudat, kontrolá pa e grupo ekstremista. Den e siudat tin 6.000 kombatiente di milisia radikal, asina teniente Talib Shaghati di base militar a indiká na prensa. No a indiká kuantu estranhero tin den nan. E grupo di Estado Islámiko a tuma Mosul, e di dos siudat mas grandi di Irak, denter di un ofensiva relámpago den verano di 2014. E grupo ekstremista a sufri un serie di derota den último aña i Mosul ta e último gran bastion urbano na Irak. Pa aworakí, e milisianonan a pone un resistensia feros den e pueblo rondó di e siudat, kaminda nan a konsentrá mayor parti di e lucha. E grupo Estado Islámiko a manda trùknan kargá ku eksplosivo te na e frente i tira granatnan pa frena e avanse di forsanan irakí. E tropanan di 9 divishon di Ehérsito irakí ta na un kilometer di distansia for di Hamdaniyah, un lokalidat tradishonalmente Kristian mihó konosí komo Bakhdida, un ofisial kontingente a indiká na Associated Press. E grupo di Estado Islámiko a empleá 12 outo bòm for di djamars, tur a eksplotá promé ku nan a alkansá nan ophetivonan. E tropanan a sufri algun morto pa e tiramentu di granat, a keda añadí pero sin duna sifranan eksakto di morto. E ofisial a papia bou di kondishonnan di keda anónimo pasó e no ta outorisá na papia ku prensa. Irak a lansa un operashon grandi djaluna pa retomá Mosul. Ta trata di e operashon mas grandi di Ehérsito irakí for di e invashon liderá pa Estádos Unídos den 2003. Por lo ménos 25.000 tropa, inkluyendo kombatientenan tribal suni, forsanan kurdo konosí komo pershmerga i milisia chií respaldá pa estado konosí komo Unidatnan di Mobilisashon Popular tabata aserká e siudat for di diferente direkshon. Partisipashon di milisia chií den e kampaña pa rekuperá Mosul, di mayoria suni, a lanta e temor ku e kampaña por lanta tenshonnan religioso. Grupo humanitario a akusá milisia chií di abusu den kampañanan previo kontra zonanan kontrolá pa grupo ekstremista Estado Islámiko. Den un intento pa aliviá e preokupashonnan, lidernan milisiano chií a anunsiá djamars ku nan lo drenta e siudat i lo sentrá solamente pa kapturá e lokalidat di Tal Afar, di mayoria chií situá ost di Mosul. “E úniko tropanan ku lo drenta Mosul ta ehérsito i polis, no e Unidatnan di Mobilisashon Popular ni e peshmerganan”, asina Hadi al-Amiri, lider di brigada Badr, un di e milisianan chií di mas grandi a bisa. ” Esaki ta loke a keda akordá”, el a afirmá den un rueda di prensa den siudat di Najaf. Amnistia Internashonal a afirmá den un rapòrt djamars ku forsanan paramilitar i di gobièrnu irakí a detené, torturá i mata mas di shen sivil árabe suni ku tabata hui for di zonanan kontrolá pa e grupo ekstremista di Estado Islámiko durante operashon e aña aki pa rekuperá e siudat suni di Fallujah, ost di Baghdad.
E gobièrnu irakí a ninga kualke infrakshon sistemátiko pa parti di forsanan di seguridat o di milisia, i a señalá ku personanan konkreto a rospondé pa abusunan okashoná.