WASHINGTON, USA (AFP).- Presidente di Merka, Donald Trump, lo manda 1.500 militar mas pa e frontera ku Mexico komo parti di su lucha kontra di migrashon ilegal.
Presidente Trump a firma un órden ehekutivo pa manda 1.500 militar adishonal na e frontera zùit di Merka”, segun su bosero Karoline Leavitt na White House.
Te ku awor e personal militar den e zona a bin ta kumpli ku trabounan di logístiko i apoyo di transporte pa yuda e Ofisina di Duana i Protekshon di Frontera di Merka (CBP), enkargá pa evitá òf nenga e kruse di migrantenan sin visa.
Den un komunikado e hefe di diplomasia di Merka, Marco Rubio, a primintí un “polítika eksterior pragmátiko”.
Trump a primintí deportashon masal di migrantenan den situashon iregular pero ta di mira si paisnan manera Cuba, Nicaragua i Venezuela ta aseptá nan i ademas kuantu nan ta dispuesto na risibí.
E presidente republikano su intenshon ta pa kuminsá na ekspulsá esnan ku tin antesedente penal.
E kongreso, di mayoria republikano, a fasilitá e situashon pa Trump, aprobando un lei ku ta eksigí pa detené migrantenan den situashon iregular i kendenan ta akusá di algun delito, inkluso robo.
El a konta ku respaldo di 50 demokrat i ta antisipá ku Trump lo firm’é di inmediato pa bira e promé lei ku e ta firma den su di dos mandato.
E lei “Laken Riley” ta karga nòmber di un studiante di 22 aña asesiná pa José Antonio Ibarra, un venezolano di 26 aña ku outoridatnan tabata buská pa robo.
Guera den Ukrania
Riba su ret Truth Social, Trump a atvertí su kolega ruso, Vladimir Putin, ku esaki ta keda eksponé na sanshonnan si no logra “awor aíi” un akuerdo pa pone fin na e guera den Ukrania.
Te ku su instalashon djaluna, Trump a primintí di pone fin na e guera di Ukrania inkluso, promé ku el a sinta komo presidente, loke ta pone hende pensa ku e por obligá Kiev na hasi konseshonnan ku Mosku.
Pero den último oranan ta parse ku el a hasi su tono respekto Putin poko mas fuerte.