SAINT PETERSBURG, RUSIA, AP.- Por lo ménos 10 persona a resultá heridá djárason pa un eksploshon den un supermerkado na Saint Petersburg, e segundo siudat mas grandi di Rusia i kaminda algun luna pasá tabatin un atentado mortal, segun informashon di outoridat.
E Komité di Investigashon, e agensia di seguridat prinsipal di e pais, a bisa ku un artefakto di 200 gram di eksplosivo a eksplotá den kompartimentu kaminda klientenan ta laga nan sakunan.
Niun hende no a atribuí responsabilidat pa e eksploshon den supermerkado di Perekrestok, den distrito Kalininsky, na nortwèst di e siudat.
Alexander Klaus, direktor di e unidat lokal di Komité di Investigashon, a bisa ku 10 persona a resultá heridá i mester a wòrdu hospitalisá.
Outoridat a kuminsá un investigashon riba e suseso.
Viktoria Gordeyeva, un habitante di Saint Petersburg ku a pasa den e zona algu despues di e eksploshon, a bisa ku e hendenan tabatin miedu di drenta den otro tiendanan.
Presidente Vladimir Putin a yama su kontra parte merikano Donald Trump na telefòn algun dia pasá pa gradisié paso CIA a duna pistanan ku a permití outoridat ruso di frustra un atentado ku bòm na Saint Petersburg.
Servisionan Federal di Seguridat a informá ku e tempu ei shete individual vinkulá ku e grupo estado Islámiko a wòrdu detené en konekshon ku e trama aki. Kremlin a indiká ku e suhetonan kier a pone bòm den Katedral di Kazan na Saint Petersburg i otro sitionan emblemátiko di e siudat.
Den aprel, un atentado suisidio den un trein na Saint Petersburg a laga 16 morto i mas di 50 herido.
