10 Miembro nobo den Salon di Fama di FDOK

...Den luna di desèmber ultimo a instalá 10 figura destaká di deporte nashonal den Salon di Fama di FDOK...

WILLEMSTAD.- Ku e honor ku ta korespondé na kada un di nan, ayera nochi FDOK a instalá 10 miembro nobo den Salon di Fama di deporte nashonal. E evento a tuma lugá den ouditorio di World Trade Center, kaminda figuranan destaká di deporte di nos pais a bini huntu pa un okashon asina spesial.

Ku instalashon dje miembronan nobo, Salon di Fama di FDOK awor ta konta ku 64 baluarte di nos deporte, representando un kantidat di16 dje trintiocho federashonnan miembro.

Presidente di FDOK Jean Francisca, na okashon di instalashon dje miembronan nobo a trese dilanti ku sigur tin un retraso grandi ku nombramentu di figuranan deportivo destaká. E lista ta largu pero manera e presidente a trese dilanti, na momento di instalashon kada ken mester risibí e atenshon ku e ta meresé.

Pa deporte nashonal 2019 ta un aña difísil, pero asina mes e presidente ta mira ku kompará ku diferente otro sektor den nos komunidat por bisa ku a bai bon.

Mas aleu el a pone atenshon spesial na e hopi boluntarionan den deporte di nos pais. Ta trata di boluntarionan ku hopi biaha ta biba den olvido, siendo ku nan ta meresé rekonosimentu. “Por bisa ku e bendishon ta bini djariba pa nan”, segun Francisca a agregá.

E parti di instalashon mes a kana hopi rápido, ounke lamentabel tabata e difikultatnan tékniko ku a stroba pa mustra imágen di di e baluartenan den nan añanan komo deportista i/òf dirigente.

Renato “Nato” Anasagasti

Nato ta un figura destaká di beisbòl lokal, kende a kuminsá na edat di 8 aña. Den su karera el a hunga pa Sta. Maria Piartes, Blue Hawks, Wild Cats i Royal Scorpions. Na hopi okashon el a gana título di bateo, di kareda empuhá i te hasta di homerun. Ounke su posishon tabata 3ra base, un aña el a sali te hasta kampion picher. Nato na 9 okashon a forma parti di ekipo kampion di Kòrsou, di kua ocho ku Wild Cats i shete di nan den su kalidat komo manager/ player.

 

Sylvanie Clarke

Sylvanie tabata aktivo den sòftbòl, kuminsando ku Pichingolo. Na aña 1976 el a forma parti dje selekshon di Antia Hulandes ku a titulá kampion Sentro Amerikano i di Karibe na El Salvador. Den añanan 70 Sylvanie a kuminsá siña skor beisbòl i a hasi esaki durante mas ku 10 aña. Despues el a keda aserká pa FEBEKO ku e petishon pa saka sifranan di beisbòl, loke tambe el a hasi durante di vários aña. Na 2006 Sylvania a duna seminario na Sao Paulo, Brazil, pa International Softball Org.

 

Henk “Henky” D’Arnault

Henky ta di deporte di vòlibòl i a forma parti dje ekipo Sithoc ku kua na 14 okashon el a titulá kampion di Kòrsou. El a forma parti di selekshon ku a hunga Weganan CAC di 1970 i 1974. Despues el a konsentrá riba arbitrahe i a bira rèfri internashonal, dirigiendo wega na e.o. Rep. Dominicana, Cuba, Pto., Rico i Sürnam

 

Wenfrid “Wenny” Jacoba

Wenny a kuminsá hunga beisbòl na edat di 8 aña den bario Sta. Helena i Sta. Maria. E ta ko-fundadó di Sta. Maria Giants. El a hunga 10 aña ku e ekipo aki i a yuda na promové pa Dobel A. Na 1976 Wenny a pasa pa Wild Cats, kaminda el a gana diferente título komo hungadó i tékniko. Durante di su karera el a sali di biahe na masha hopi okashon ku selekshon.

 

Hubert Jansen

Hubert a hasi un karera impreshonante komo dirigente, kuminsando na edat hóben di 18 aña komo sekretario di ekipo di basketbòl. El a okupá funshon den federashon lokal i antiano di basketbòl, tambe den federashon lokal i antiano di futbòl i tambe hopi aña komo dirigente di Komité Olímpiko di Antia Hulandes (NAOC). Hubert Jansen ta e kara konosí komo hefe di Sedreko, te ku su penshun den desèmber di 1989.

 

 

Nazario Martijn (dfm)

Coach di natashon Nazario Martijn a risibí un homenahe póstumo. Nazario a kuminsá na aña 1973 den natashon i tabata aktivo te 1986. Na 1985 el a drenta servisio di Sedreko i ku tempu el a asistí na vários kurso komo entrenadó, e.o. na Argentina, Gresia, St. Lucia, Kansas City i Hawai. Na masha hopi okashon el a fungi komo headcoach di selekshon. Su yu muhé Zariona a aseptá e Sertifikado di Rekonosimentu na nomber di di famia di Nazario (dfm)

 

Eric Ogenia

Eric ta dirigente destaká di vòlibòl, ounke e mes no a praktiká e deporte di forma organisá. Despues di su periodo di estudio na Hulanda, el a regresá Kòrsou i a bolbe djòin su ekipo Xaverianen komo trainer. Eric na vários okashon tabata presidente di FEVOKO, pero tambe a okupá i ketu bai ta aktivo den e organisashon regional CAZOVA komo tesorero. Tambe durante di kuater aña e tabata tesorero di NAOC.

 

Gilbert “Gibi” Snijders

Gibi a praktiká diferente deporte, entre kua atletismo, natashon, yudo, vòlibòl, tènis, etc. pero su deporte prinsipal tabata bowling. Gran parti di su karera tabata komo dirigente, e.o. den little league i bowling. Durante di 14 aña e tabata den direktiva di Concecabol i den 2002 a keda eligí den direktiva di Panamericano Bowling Confederation dn kua el a sirbi durante di 12 aña.

 

Eva Marie Tujeehut-Suriel

“Amy” ta di e deporte taekwondo, pero tambe tabata aktivo den basketbòl i vòlibòl, ganando kampionato di Kòrsou i Antia. El a bira mas konosí den taekwondo, deporte ku el a praktiká di 1980 pa 2007. Den e deporte aki el a gana e.o. medaya di oro den kampionato na Pto. Rico, plata na Lima, Peru, oro na Haiti, bròns na Bayamon i bròns na Venezuela. El a bringa tambe na Sur Korea, na New York i na Argentina.

 

Hubert “Ibi” Zimmerman

Ibi ta di bòkseo, deporte den kua el a gana vários título na e.o. Hulanda, título Inter America na 9188, título Inter Continental na US Virgin Islands. Den su karera el a gana dje kampion oropeo Pedro van Raamsdonk pa medio di nòkout. Su último pelea tabata na aña 192, ora ku el a pèrdè kontra e kampion mundial Eddy Smulders. El a retirá ku rèkòrt di 30 viktoria i 5 derota. E ta fundadó di Boca Boxing Club.

 

SHARE

LEAVE A REPLY