WILLEMSTAD.-Tres kaso di asesinato den un siman definitivamente a kousa un impakto hopi grandi riba komunidat di Kòrsou. Esei a pone ku minister di hustisia a yama un konferensha di prensa huntu ku Kuerpo Polisial i Ministerio Públiko. E tres kasonan; esta esun na Klein Zuurzak kaminda a mata un hòmber den un apartamentu, na di dos lugá e kaso di asesinato na playa Santa Cruz i finalmente e kaso di playa Jeremi ta e kasonan ku hustisia a trata durante di e enkuentro ku prensa di djasabra mèrdia. Fiskal Mayó suplente Dr. Mr. Clarelli Hato a informá ku hustisia ta pone 10 mil florin pa e tep di oro pa kada kaso. Pues kada kaso separá tin 10 mil florin di rekompensa pa e tep ku kondusí na solushon di e kaso.
Pa loke ta trata e kaso di Klein Zuurzak sra. Hato a bisa ku ainda no tin niun detenshon den e kaso ei. Tur informashon ta bon bini. Pa loke ta trata e kaso ku a tuma lugá den e mardugá di djabièrnè na playa Santa Cruz Fiskal Mayó suplente a indiká ku a tira e víktima pa despues sak’é for di outo i bent’é na laman.
E di tres kaso ta esun na Jeremi den kual dos sospechoso a tira dirigí riba un hòmber sintá den un outo na e playa pa despues bini bek i sigui tira dirigí riba e hòmber aki. E víktima a haña 10 herida di bala. Tin 10 mil florin di rekompensa pa kada un di e kasonan aki. Mas detaye den edishon di EXTRA.
