WILLEMSTAD – Ayera atardi un tim ku ta konsistí di Wardakosta i Duana a tene un asina yama 100% kontrol riba un barku ku a sali for di Cartagena, Colombia ku destinashon final Kòrsou. Ta trata di un toubot bou di e nòmber Koole 42 i ta nabegá bou di e bandera di Gibraltar. E operashon di e akshon aki a inisiá for di riba laman na momentu ku Wardakosta huntu ku duana a subi e toubot aki i dirigié esaki durante su entrada den haf. A bai ku Koole 42 na e sitio di investigashon unda ya tabatin un grupo di duanero mas kla para pa subi pa sigui ku e kontrol. E barku mes a para na Parera unda semper e barku aki lo ta mara normalmente. E kontrol a dura largu i a bin kaba te banda di 8or di anochi na momentu ku Wardakosta i Duana a duna e barku liber paso tur kos tabata na òrdu.
