ORANJESTAD.-Polis di Aruba ya informá ku un total di 107 shofùr a haña un ‘kayente’, esta u but di polis despues ku a konstatá un otro violashon den tráfiko na Aruba. Esei a tuma lugá djarason último 23 sèptèmber durante di oranan di atardi pa anochi lat. Ta polisnan uniformá di distrikto di Oranjestad a tene un kontròl den tráfiko, dirigí riba velosidat haltu, selular i diferente otro infrakshon den tráfiko.
E kontròl a tuma lugá riba Avenida Watty Vos Boulevard na altura di rotònde Bushiri, rotònde Cumana i tambe na Henny Eman Boulevard na altura di ATA. Aparte di 107 but a hasi dos detenshon tambe. Ta trata di hendenan ku nan pèrmit di estadia a vense i tambe a tou un outo ku no tabatin niun dokumentu bálido.
E butnan duná ta pa entre otro;
* Surpasá velosidat máksimo,
* Usa selular,
* Reibeweis,
* Faha di seguridat,
* Impuesto di plachi number,
* Seguro,
* Keuringskaart,
* Lus defekto.
kontròl di tráfiko lo sigui i Kuerpo Polisial Aruba ta hasi un apelashon pa tur shofùr tin dokumentunan na òrdu i bálido. Un tráfiko sigur ta responsabilidat di tur hende!
