WASHINGTON, AP. – Algun siman despues ku Pentágono a permití sòldatnan transgenero, ofisialnan di ehérsito a bisa ku 10 sòldat a pidi pa wòrdu rekonosé formalmente pa e género nobo ku nan ta preferá.
E tiki kantidat di sòldatnan ku a hasi e pedido aki ta representá solamente e grupo di esnan ku a bisa públikamente ku nan ta transgenero i no ta inkluí sòldatnan ku ta konsiderando esaki òf kuminsando e transishon di género òf tampoko esnan ku no kier hasi un trámite ofisial.
General Mark Milley, hefe di Estado Mayor di Ehérsito, a bisa ku awor e asuntu klave ta pa eduká sòldatnan, spesialmente e komandantenan ku mester tuma desishon riba sòldatnan den nan unidat ku ta pidi kambio di género.
E polítika di Pentágono a drenta na vigor dia promé di òktober i e sekretario di ehérsito Eric Fanning a aprobá e reglanan nobo di transgenero na komienso di e luna aki. Sekretario di Defensa Ash Carter a anunsiá den yüni ku e lo pone fin na e prohibishon di transgeneronan sirbiendo su pais abiertamente den forsanan armá.
Awor e sòldatnan aki por risibí kuido médiko i kuminsá kambia nan identifikashon di género den e sistema personal di Pentágono.