Willemstad.– Fundashon Desaroyo Deportivo Kòrsou (FDDK), ta proveé diariamente na entre otro Sentro Deportivo Kòrsou edukashon físiko na diferente skol di fundeshi i skol avansá durante oranan di mainta i mèrdia. Ayera durante lèsnan di Edukashon Físiko na un skol avansá (VSBO) algun alumno a kuminsá bira malu ku señalnan di hyperventilashon i temblamentu. Mes ora a para e lèsnan aki i e yama ambulans pa asistensia. Na yegada di promé ambulans mester a yama dos ambulans mas mirando e kantidat di muchanan ku tabata birando malu. En total 11 hóben entre 14 i 17 aña a bira malu, inkluyendo unu ku a duna señalnan di shòk na momento ku e la mira su ruman bira malu. FDDK a aserka Polis i tambe Geneeskunde en Gezondheidszaken (GGD) ku a manda mesora representashon di kalamidat i inspekshon supervisá pa dòkter Arias. A tuma e desishon di transportá tur e hóbennan aki pa Curaçao Medical Center (CMC) pa hasi tèstnan nesesario pa asina por determiná loke a kondusí na e situashon aki. GGD den kompletu koperashon ku FDDK a pidi tambe Analytisch Diagnostisch Centrum (ADC) pa bin tuma muestra di awa na e puntonan públiko di bebe awa na SDK pa hasi tèstnan nesesario pa asina garantisá ku e awa na SDK tambe ta seif. FDDK huntu ku GGD a tuma e medidanan di seguridat nesesario pa garantisá ku usuarionan di SDK por usa e kompleho sin riesgonan adishonal. Na e momentonan aki FDDK ta den kontakto estrecho ku GGD i CMC en espera di e resultadonan di e tèstnan di e alumnonan aki pa haña mas informashon di e motibu di e situashon ku a presentá su mes. FDDK ta gradisí su trahadónan, servisio di Ambulans, Polis, GGD, Inspectie i ADC pa e forma rápido ku nan a aktivá pa atendé e situashon ku a presentá.
