12 luna prizòn pa hòmber yu di Kòrsou ku a defendé su amiga

WILLEMSTAD.- Un hòmber yu di Kòrsou a keda kondená resientemente den Korte na Rotterdam pa motibu ku el a kòrta dos persona despues di un fiesta ku tabatin den un klup nokturno. E loke ku e hòmber aki a splika korte ta ku el a aktua instantáneo, esta no tabatin tempu pa pensa, mirando e echo ku un grupo di 6 hende hòmber tabata molestiá su amiga ku tabata yama pa yudansa i esei a pone ku el a aktua mesora. Pero Korte no ta mira esaki komo un aktuashon proporshonal i a kondená e yu di Kòrsou na 12 luna di prizòn.

Tur kos a kuminsá den un klup nokturno den Hoogvliet, ora ku e yu di Kòrsou a konfrontá problema ku algun otro persona den e klup. Pa evitá ku e asuntu ta sali for di man e yu di Kòrsou a sali for di e klup, pero e no a skapa di e grupo ku tambe a sali pafó, pero el a sigui kana bai for di e sitio.

Un dado momentu e tabata pará riba un distansia i e ta tende kon su amiga ta grita pa yudansa. Ora el a averiguá pa sa kiko ta pasando, e ta mira e grupo di hende hòmber tabatin e amiga rondoná i tabata molesti’é.

Akinan e yu di Kòrsou su wowo a bira skur i el a kore drenta den e grupo ku algu skèrpi den su man i dos di nan a haña kòrtá. Un di nan a risibí un kòrta di 23 cm i e otro un kòrta di 7 cm.

Su abogado mr. Wever a apelá riba defensa propio i un aktuashon instantáneo, o sea no tabatin tempu pa pensa, pero aktua pa skapa su amiga di e situashon ku e tabata aden.

Fiskal no ta uni su mes ku e punto di salida di e abogado i a pidi 18 luna kastigu di prizòn pa e akusado.

Korte den su motivashon a trese dilanti ku no por hasi menshon di defensa propio o sea un aktuashon instantanio den e kaso aki. Korte ta di opinion ku e akusado mester a aktua proporshonal i den e kaso aki el a aktua desproporshonal.

E tipo di agreshonnan aki ta trese intrankilidat den komunidat i insiguridat. Korte ta haña ku pa e loke ku tabata pasando ku e amiga, por a keda atendé den un otro forma, liber di kore drenta den un grupo di hende i kuminsá zuai pa loko ku un opheto skèrpi den man.

Esaki a pone ku korte a kondená e yu di Kòrsou na 12 luna kastigu di prizòn. E akusado ta será den prizòn na Hoogvleit.

E loke ku tabata den su desbentaha ta e echo ku aki na Kòrsou e tin un karchi di kastigu tambe pa maltrato o sea agreshon.

E víktimanan a apelá riba daño i perhuisio, pero aki si Korte a bisa ku e aktuashon di e akusado ta a base di nan mes falta i p‘esei no a honra e demanda di daño i perhuisio.

(Foto Rijmond.nl)

SHARE

LEAVE A REPLY