BAGDAD, AP.- Diesdos resien nasí fayesé den un kandela registrá durante oranan di anochi den un hospital na Bagdad, segun outoridatnan a bisa djárason, den un suseso probablemente kousa pa un fayo eléktriko.
Mainta, mayornan a gòlpia pa e doló aki tabata buska nan yunan en vano miéntras famianan indigná tabata reuní den e hospital di Yarmouk, na parti wèst di Bagdad i a kulpa gobièrnu di e tragedia aki.
E direktor di e hospital, Saad Hatem Ahmed, a bisa ku e kandela a kuminsá djamars den oranan lat di anochi i ku investigashonnan preliminar tabata indiká un fayo eléktriko komo orígen di e kandela. Ocho beibi i 29 muhé interná a keda trasladá.
Outoridatnan lokal a sera e hospital, pero despues a permití akseso na algun medio. Den e departamento di maternidat, ekiponan forense ku máskara i wante tabata buska entre restu i muebelnan kimá. Un lent hel a sera entrada na e departamento, ningando reporteronan pa aserká mas.
Algun famia ku tabata yora pafó di e edifisio a afirmá ku nan beibinan ainda tabata pèrdí i a eksigí un respuesta di outoridatnan.
