MAIDUGURI, NIGERIA, AP.- Trupanan nigeriano a bringa kontra e organisashon ekstremista islámiko Boko Haram den área di lago Chad, matando 13 di su miembronan i deteniendo 10 mas. Entre nan tin 10 muhé sospechá di a yuda suministrá kontrabanda pa e rebeldenan aki. Esaki ta loke bosero di ehérsito a informá.
E sòldatnan di Batayon di Forsa Tarea 8 a pasa 72 ora promé ku a logra kore ku kombatientenan di Boko Haram ku tabata skonde den e área. Bosero di e batayon, koronel Timothy Agtigha a agregá ku mayoria kombatiente di Boko Haram a wòrdu tirá ku pistol.
E trupanan ofisial ku tabata operá den área di Chiun Gufu, Tumbuma Karami i Tumbuma Baba, a rekuperá tres arma AK-47, un rifel di karga manual i vários bala entre otro ophetonan.
El a agregá ku den un echo relashoná, sòldatnan a detené 10 supuesto kontrabandista di Boko Haram, despues di a wòrdu alertá pa un tep. E sospechosonan, seis muhé i kuater hòmber, ya tabata wòrdu investigá pa determiná e alkanse di nan partisipashon den Boko Haram.
For di desèmber 2016, e trupanan nigeriano a persiguí e kombatientenan ekstremista den zonanan kaminda esakinan a hui.
