WASHINGTON (AFP).- Un avion di guera norteamerikano F-35 mester a hasi un aterisahe urgente despues di a keda alkansá pa un tiru iraní, segun prensa. Ehérsito, despues di esei a informá ku e avion a baha sin kontratempu, ounke sin duna detayenan si en bèrdat e tabata blanko di un atake. “E avion a baha sin kontratempu i e piloto ta den kondishon stabil”, segun un komunikado dje Komando di Merka pa Medio Oriente, e kapitan Tim Hawkins.
Merka a pèrdè vários aparato for di despues ku e ofensiva huntu ku Israel kontra di Iran a kuminsá dia 28 di febrüari. Un siman pasá, seis miembro di tripulashon di un avion KC-135 a muri den un aksidente den wèst di Irak. Promé ku esei, tres avion F-15 a keda tumbá di forma aksidental pa Kuwait. Diestres militar norteamerikano a muri for di komienso dje guera kontra di Iran: shete den atakenan den Teheran kontra di basenan merikano den Medio Oriente i seis den e aksidente di avion. Ehérsito merikano a registrá 200 militar heridá, di kua dies di gravedat.
