Venezolanonan ku ayera a rekobrá nan libertat despues di a pasa añanan den prizòn, hopi di nan sin sentensia di korte.
CARACAS (AFP).- Meimei di diálogo entre gobièrnu di Venezuela i oposishon, no ménos ku 131 persona konsiderá komo prezunan polítiko ayera a rekobrá nan libertat. Entre nan tin un persona ku a keda akusá di un atentado ku ‘drone’ riba bida di Nicolas Maduro, konsiderá komo atentado kontra bida dje presidente dje tempu ei.
E hefe di delegashon opositor, Dinorah Figuera, djaweps a komprometé su mes pa pusha pa e liberashon di prezunan polítiko despues di a sostené un promé buèlta di negosiashon ku e gobièrnu interino dje pais, un proseso sostené pa Merka.
“Saka for di prizòn e prezu polítiko Emirlendris Benitez i otro 5 muhé”, segun a keda sirbí riba X pa Alfredo Romero, direktor di Foro Penal, un organisashon di derechinan humano ku ta defendé e prezunan será pa rasonnan polítiko. Benitez a keda detené den ougùstùs di 2018 ku kuater luna di embaraso i akusá di a tuma parti na un atentado ku ‘drones’ kontra di Maduro.
A akus’é di homisidio kalifiká ku a keda frustrá, terorismo i traishon na patria i a keda sentensiá na 30 aña di prizòn. Organisashonnan di derechinan humano i abogadonan defensor a denunsiá ku Benitez tabata víktima di tortura, trato kruel i te hasta el a sufri aborto.
E torturanan a lag’e den ròlstul ku parálisis parsial. Su diagnóstiko ta inkluí hernia, doló króniko pa daño na su sistema nèrvioso i frakturanan den su kolumna vertebral.
Su detenshon preventivo a surpasá e máksimo di tres aña ku ta keda establesé pa lei venezolano, i komo tal segun su abogadonan ku e mester a keda husgá den libertat.
Den 2022 e grupo di trabou di Nashonnan Uní riba detenshon arbitrario a pidi su libertat inmediato, despues di a konkluí ku su detenshon tabata karesé di base legal.
