Gobièrnu di Ecuador a intensifiká su akshonnan kontra di narkotráfiko, inkluso ku toke de keda di sinku ora durante oranan di anochi den sierto siudat.
QUITO, Ecuador (AFP).- Polis di Ecuador a kapturá 14 aparente miembro di un gèng ku ta operá den e provinsia violento di El Oro. E detenshon a tuma lugá meimei di toke de keda nokturno deklará pa gobièrnu den e zonanan ku mas konflikto dje pais.
E minister John Reimberg a informá riba X ku e operashon denominá komo “Sombra” a desmantelá un “geng di ekstorshon, asesinato, robo i trafikashon di droga” ku tabata operá den e barionan di Machala i Pasaje. E 14 detenidonan ta parti dje gèng Los Lobos i tin vínkulo ku e “trafikashon di droga i uso di menornan di edat pa aktividatnan ilegal”, segun e minister. Apesar dje tokenan de keda i estadonan di eksepshon determiná pa e presidente Daniel Noboa, e violensia no ta baha den e pais.
E ofensiva nobo di parti di gobièrnu dje pais ta tuma lugá despues di e bishita dje sekretario di estado di Merka, Marco Rubio, na Quito, den un gira durante kua el a eligí su “fiel” aliado Ecuador pa su lucha kontra droga i a ofresé 45 mion dòler pa fondonan di seguridat.
Noboa ayera mainta a duna di konosé den un entrevista ku “e guera aki ta kosta pais mas ku 1.500 mion dòler pa aña”.
