BOSTON,USA (AFP).- E eks-militar di Guardia Nashonal Aéreo di Merka Jack Teixeira, a keda kondená na 15 aña di prizòn pa motibu di a filtra dokumentonan klasifiká, partikularmente esnan di e guera di Rusia den Ukrania.
Teixeira, di 22 aña, den luna di mart a deklará su mes kulpabel di seis akusashon di violashon di lei di spionahe i a rekonosé di a filtra algun dozein di dokumentonan gubernamental konfidensial, entre nan algun ku e menshon di “sekreto máksimo”, riba e plataforma Discord, via kua nan a resultá riba otro retnan sosial.
Ministerio Públiko a solisitá un kondena di 200 luna kasi 17 aña pa su papel sentral “den un dje violashonnan mas signifikante i transendental den historia di Merka”, mientras ku defensa a pidi un máksimo di 11 aña.
Mayoria dje dokumentonan ku Teixeira a filtra tabata relashoná ku e invashon ruso den Ukrania. Algun di nan tabatin informashon sensibel manera movementunan detayá di tropanan i te asta e kalendario di suministro di arma na Kiev, segun investigadónan.
Teixeira a kuminsá filtra e dokumentonan den febrüari di 2022 i no a keda detené sino te aprel dje siguiente aña na kas di su mayornan serka di Boston, despues di simannan di investigashon di forsanan di seguridat pa haña sa kon informashon sensibel di Pentagon tabata yega riba internèt.
E kaso a hinka Washington den un situashon difísil, ku preguntanan riba e posibel fayonan di seguridat ya ku e hóben, ku apénas den 2019 a drenta servisio militar i tabatin e di tres grado mas abou di herarkia, tabatin akseso na datonan krusial.
Por resultá ku e kondena no ta e punto final dje problemanan legal di Teixeira. Forsa Aéreo a anunsiá di ke proses’é dilanti di un korte marsial pa komportashon robes.
