Sostenedónan di presidente kolombiano Gustavo Petro ta mira transmishon dje bishita ku nan presidente a hasi serka Donald Trump.
BOGOTA (AFP).- Militarnan kolombiano a eliminá por lo ménos 15 rebelde dje gueria ELN meimei di un ofensiva kontra di narkotráfiko, segun un akuerdo entre e presidentenan Gustavo Petro i Donald Trump ,segun un balanse nobo di ehérsito.
E atake a tuma lugá djarason den e region di Catatumbo, na frontera ku Venezuela, despues dje promé enkuentronan na White House entre Petro i Trump durante kua a komprometé pa huntu enfrentá gueria i e kartelnan di droga.
Ehérsito na un promé instante e referí na un kantidat di shete morto, den e ofensiva aki ku a inkluí bombardeonan i atakenan ku kayon meimei dje vegetashon di selva i matanan grandi di blachi di koka. Un responsabel di ehersito a bisa na AFP ku den e operashon aki no tabatin partisipashon di forsanan norteamerikano.
Despues dje bombardeonan, ehérsito a desmantelá vários kampamentu di gueria i a haña drone, mas ku 200 granada,15 fusil, vários arma kòrtiku i masha hopi munishon, segun e general Hugo Lopez, komandante di Forsanan Militar den entrevista ku Blue Radio.
Petro i Trump djamars último a akordá durante di un reunion na White House pa huntu bringa e tres prinsipal kabesantenan di gruponan kriminal na Colombia: alias Ivan Mordiscu di e disidensianan di FARC; Chiquito Malo, di Clan del Golfo; i Pablito, di tres den linia di mando di Ejercito de Liberación Nacional (ELN).
Komo rechaso pa e akuerdonan aki, e prinsipal grupo di kokaina konosí komo Clan del Golfo a kibra negashonnan di pas ku nan tabata sostené ku gobièrnu kolombiano na Qatar.
Faltando seis luna pa laga presidensia i preshoná or di Washington, presidente Petro a kambia su polítika di pas ku e gruponan armá pa un kombate frontal kontra di narkotráfiko.
Na Colombia no tin reelekshon presidensial, pero Petro ta aspirá pa mantené su forsanan polítiko na pader.
