Aktivistanan di organisashon di derechinan humano na Venezuela ta atendé un demostrashon pa eksigí libertat di mas prezu polítiko, kendenan ta será den kuater diferente prizòn dje pais.
CARACAS (AFP).- Por lo ménos 17 prezu mas por a bandoná prizòn ayera den kuadro dje proseso pa liberá prezunan polítiko for di despues di kaptura di presidente Nicolás Maduro durante un operashon militar di Merka na Venezuela. Dia 8 di yanüari e hefe di Parlamento, Jorge Rodriguez, a anunsiá inisio di un proseso pa liberá “un kantidat importante” di detenidonan, kendenan ta será sin ningun sentensia di korte.
E organisashon di derechinan humano Foro Penal, ayera a referí na 17 prezu polítiko mas ku a haña nan libertat, pa yega na un total di 367 for di 8 di yanüari. E prezunan tabata será den kuater diferente prizòn serka di Caracas.
E presidente interino dje pais, Delcy Rodriguez, ayera a hasi anunsio di un lei di amnistia general bou di preshon di Merka. Rodriguez, kende tabata vise presidente di Maduro, a bisa di a traha “di forma intenso” pa yega na e amnistia.
E liberashonnan ta tumando lugá den kuadro di un buèlta di e relashonnan entre Caracas i Washington despues di kaptura di Maduro i esaki su kasá Cilia Flores. Djasabra 31 di yanüari a yega Caracas e hefe di mishon diplomátiko di Merka, Laura Dogu, pa kuminsá traha pa drecha e relashonnan entre e dos paisnan.
