DAKAR, SENEGAL, AP.- Hòmbernan arma a mata 17 sòldat i herida 35 mas durante un atake kontra un kampo militar den e region sentral di Mali. Asina e gobièrnu a informá. Dos grupo diferente a tuma responsabilidat di e atentado via un komunikado, e gobièrnu señalá ku ainda no sa ken a efektuá e atake den siudat di Nampala.
Frente Liberashon di Masina, ku tin vínkulo ku Al Qaeda, a tuma responsabilidat di e atentado riba retnan sosial. E grupo ekstremista ta konstituí prinsipalmente di miembronan di e grupo étniko Fulani i ku a atribuí vários atentado kontra ehérsito aña pasá.
E atakenan di e grupo den e region sentral di Mali a generá alarma paso esakinan ta representá un subida di ekstremismo muchu mas na parti sùit.
Un otro grupo, Aliansa Nashonal pa Protekshon di Identidat Fulani i Restourashon di Hustisia, a bisa na The Associated Press ku esaki tabata responsabel di e atake na Nampala.
Ta promé biaha ku e grupo, forma den último lunanan, ta realisá un atake kontra un posishon militar di Mali.
“Nos a ataká Nampala mainta pa rospondé na e atentadonan mortal di ehérsito maliense kontra nos pueblo na Peul”, segun Oumar Aldjana, sekretario general di e grupo. E gruponan Fulani den e region ta akusá ehérsito di detenshon, tortura i asesinato di sivilnan.
El a indiká ku a konfiská vários trùk i munishon i ku tres miembro di su grupo a resultá herida.
Aldjana a bisa ku e grupo no ta ekstremista. “Nos ta usa e lema “Allahu Akbar (Dios ta grandi) durante e atake, pero no tin nada di aber ku yihadismo”.
