E akshonnan fuerte di presidente dominikano Abinader kontra di haitianonan (ilegal) den Rep. Dominicana a bolbe intensifiká.
SANTO DOMINGO (AFP).- Outoridatnan di migrashon dominikano for di fin di aprel a detené mas ku 2.000 haitiano den razianan realisá den hospitalnan públiko, inkluso sentenáres di muhé na estado i muchanan.
E medida ta den kuadro di un protokòl nobo ku ta eksigí pa estranheronan ku ta den sentronan di salú mustra nan dokumentonan i ku nan ta keda deportá despues di a risibí e atenshon médiko.
E akshon ta den kuadro dje polítika fuerte di e presidente dominikano, Luis Abinader, pa ku Haiti, ku deportashon masivo, siere parsial di frontera terestre i suspenshon di konekshon aéreo.
E medida nobo a drenta na vigor dia 21 di aprel. For di e dia ei, direkshon General di Migrashon a realisá 642 akshon te ku 30 di mei den un kantidat di hospital.
Dje total di 2.188 detenidonan tin 353 hòmber i 442 muhé. Mas aleu ta konta ku 186 hende muhé na estado i 559 ku resien a duna lus. Tambe a konta 648 yu.
Nashonnan Uní a denunsiá e protokòl dominikano nobo i a pidi rèspèt pa “e kompromisonan di protekshon di poblashonnan vulnerabel”.
Den e promé sinku lunanan di aña, outoridatnan dominikano a deportá poko mas ku 143.000 haitiano sin dokumento, di akuerdo ku sifranan ofisial.
