MAASTRICHT.-Fayo den suministro di koriente den un hospital na Ulanda a kousa morto di dos pashènt, esei un investigashon a konkluí. Ta trata di un kaso ku a tuma lugá na aprel di e aña aki den e hospital Maastricht UMC, den kual dos pashènt di Corona a pèrdè nan bida. For di momentu ku e kaso a tuma lugá ya kaba tabatin e pensamentu ku e fayo den koriente lo por tabata e kousa di morto di e pashèntnan, pero awor e resultado di e investigashon a konfirmá esei.

Durante di un konferensia di prensa e funshonario ku tabata enkargá ku e investigashon a splika e detayenan. Investigashon a demostrá ku koriente a bai na sierto parti di e hospital banda di 11’or di anochi. Tabata kasi mitar di un di mardugá ku un enfermera a ripara riba su monitornan ku un pashènt tabata aktua intrankil. Dentro di un minüt e enfermera a yega na kama di e pashènt i a nota ku e mashin ku ta sòru a fluho di oksígeno Optiflow a stòp di traha. Mesora e enfermera a aktua kambiando e pashènt su Optiflow pa un otro stòpkontakt. Debí na medidanan èkstra pa evitá infekshon e portanan ta sera i esei ta pone ku e personal no ta skucha fásil ora alarma di un mashin zona. El a ripara ku den e área tin mas pashènt ku mesun problema i asina a atendé kada unu. E investigashon ta revelá ku e pashèntnan a keda 1 ora i 15 minüt sin oksígeno di e mashinnan.

E dos personanan ku a fayesé ta hendenan di 67 i 76 aña. E rapòrt médiko di e dos pashèntnan aki ta indiká ku nan situashon tabata hopi kritiko i komo tal nan chèns di sobrebibí tabata kasi nulo.

E konklushon ta ku e personal di e hospital a aktua korekto.

 

LAGA UN KOMENTARIO

Please enter your comment!
Please enter your name here