WILLEMSTAD.- Un di e departamentonan den Sentro di Detenshon i Korekshon Kòrsou (SDKK) ku sigur ta e tópiko di e último simannan ta e departamento di Barak.
Esaki ta kaminda ku ta enkarselá personanan ku yega nos isla di forma ilegal sea via di laman òf di otro forma i ku polis a gara nan ya riba nos isla.
Durante di e dia habrí pa Prensa ayera, direktor di SDKK sr. Urny Floran a duna un presentashon amplio relashoná ku detenshon i enkarselashon di e personanan indokumentá.
Loke a bin dilanti ta ku durante di e último 5 añanan, mayoria di e personanan indokumentá ku a keda detené, a drenta nos isla via di laman.
E loke ku mas ta remarkabel te echo ku ántes 5% di e personanan indokumentá ku tabata yega i permanesé riba nos isla tabata venezolano, awor a yega e kantidat remarkabel di 78%.
Na di dos luna ta sigui e personanan di nashonalidat kolombiano ku ta forma un total di 6% di e kantidat di personanan indokumentá ku ta keda detené.
Enkarselashon di personanan indokumentá ku keda detené tantu muhé komo hòmber tin hopi gastu mara na dje.
Gastunan pa kada un persona indokumentá ku keda detené ta mas o ménos Fl.350 pa kada dia. Esaki ta enserá alimento, kuido i te asta pañanan pa esnan ku keda detené sin nada huntu ku nan.
E echo ku frontera ta sera ta pone ku e personanan indokumentá ta keda muchu mas dia ku normal loke ta hasi e gastunan pa ku kada persona enkarselá muchu mas.
Un otro problema ku tambe ta trese gastunan astronómiko kuné, ta huida di e indokumentadonan.
Den e último aña tabatin sigur 4 huida na e barak di personanan indokumentá, inkluyendo e huida di siman pasá.
Segun sifranan ku a keda presentá, un promedio di Fl.60.000 pa luna ta bai na reparashon na e barak na momentu ku huida tuma lugá. Aktualmente tin re konstrukshon tumando lugá na e baraknan aki.
E promé fase ta plania pa terminá fin di e luna aki.
Na momentu ku e baraknan ta kla, por akapará un kantidat di mas o ménos 50 persona indokumentá. Situashon finansiero ta pone ku no por rekonstruí e departamento di barak kompleto. Un re konstrukshon total di e departamento barak lo sali sigur 6 mion florin. Pa esaki a hasi un petishon na Ulanda pa yuda ku e fondonan, segun Floran a indiká.
