MERKA.- E pelíkula ‘The Irishman’ den shete dia a keda mira rònt mundu pa 26.4 mion kuenta di Netflix, asina e empresa di ‘videostreaming’ a duna di konosé.
E ròlnan prinsipal den ‘The Irishman’ ta keda interpretá pa Robert de Niro, Al Pacino i Joe Pesci.
E pelíkula a keda estrená dia 14 di novèmber último den teatronan di sine i riba 27 di novèmber ela keda estrená internashonalmente riba Netflix.
E pelíkula di krímen ta basa riba e buki ‘I Heard you Paint Houses’ di Charles Brandt. E pelíkula ta trata e bida di e asesino, Frank ‘The Irishman’ Sheeran. Riba su kama di morto e ta splika di e desaparishon di e lider sindikal Jim Hoffa (Pacino) ku na 1975 a disparsé i ku for dje tempu ei su kaso relashoná ku su desaparishon no a keda solushoná.
‘The Irishman’ a keda nominá den sinku kategoria pa un ‘Golden Globe’.
