…27 di yüli awor ta Zomer Carnaval den Rotterdam. E preparashonnan ya a kuminsá i espektativanan ta grandi. E fundashon a formalisá e kontaktonan di nobo ku organisadónan di karnaval na Kòrsou i asina ban mira si e aña aki tin personanan òf gruponan ku lo forma parti di e karnaval na Ulanda.

Karel Willems presidente di e fundashon Zomercarnaval Nederland tabata na Kòrsou resientemente i nos a papia kuné riba e preparashonnan.

 

Fundadó….

Karel Willems ta un di e fundadónan di ZomerCarnaval na Ulanda. E tin 28 aña komo presidente di e fundashon aki. 36 aña pasá a kuminsá ku karnaval den zomer na Ulanda. A kuminsá kuné pasobra wenter ta muchu friu i normalmente febrüari i mart ta friu i nos karnaval krioyo no por tene den e temporada aki i p’esei den zomer. Inglatera tambe tin nan karnaval den zomer i Fransia meskos. E fundashon a keda lantá dirigí riba e komunidat di Antia e tempu ei pero tabatin hopi petishon di otro paisnan pa tambe partisipá i pa haña mas supsidio i spònser mester a ampli’é. I p’esei a yam’é ZomerCarnaval Nederland. Tur aña tin den kareda di 24 nashon ta tuma parti na e karnaval di Ulanda.

Beeld © JoniIsraeli.com

Hopi nashon a forma zomer karnaval….

 

E nashon ku mas partisipante den e karnaval ta di Kòrsou i Aruba. Nan ta representá mas di mitar i e otronan ta bin di Colombia, Santo Domingo etc., etc. tur e paisnan ku ta selebrá karnaval. E problema ta ku na Ulanda no tin un plataforma pa e artistanan aki presente. Karnaval ta nifiká artista, e hendenan ku ta diseñá tur e trahe i piesanan ta artista nan ta.  Tur ta arte i nan tin e arte ei den man i no por laga mir’é niun kaminda. I p’esei e fundashon aki tin e plataforma pa tur por bin i manifestá nan mes.

Tin hende ta bin di Inglatera, Fransia i asta Spaña. I nan ta bin djòin e karnaval na Ulanda i tur ku nan piesanan pa forma parti di e karnaval.

 

Den pasado segun Karel Willems tabatin diferente organisashon i individualnan di Kòrsou, despues di e karnaval di Kòrsou ku ta bai tuma parti di e karnaval na Ulanda. E relashon ku e organisashonnan di karnaval di Kòrsou último añanan no tabata masha bon pasobra e kosto di bista ta hopi karu aki i pa bai Ulanda ku e trahe ta kostoso. I p’esei e partisipashon a baha. Pero tin hendenan individual ta bai i djòin ku grupo na Ulanda. Ultimo añanan músikonan di Kòrsou si ta bai Ulanda i ta kombiná nan presensia na Ulanda den karnaval ku presentashon na fiestanan tambe.

Kontakto bèk ku organisashon karnaval Kòrsou…..

 

I e relashon ku e organisadónan di karnaval na Kòrsou no tabata masha bon pero for di aña pasa segun Karel Willems nan a bolbe drecha esaki, ku e organisashon JAG. Aña pasá a sinta ku JAG na Ulanda i a traha palabrashonnan nobo i tin bon kontakto ku nan awor aki. Esaki outomátikamente lo nifiká ku por ferwaktu un kooperashon mas estrecho. I ku Hubert na kabes esaki lo bai bon.

 

Prepará mesora….

 

Pa loke ta zomer karnaval mes Karel a kontra Djasabra ku despues di esun karnaval, nan ta tuma un pouze kòrtiku pa mesora por kuminsá ku e preparashonnan pa e siguiente. Na Ulanda nan ta mará na pèrmitnan pa yen kos i esei ta un di e problemanan ku ta pone ku mester kuminsá atendé tur kos hopi delantá. Tambe mester pidi supsidio pasobra e parti finansiero di e fundashon ta konsistí di 3 pida, supsidio ku bo tin di pidi for di sèptèmber meskos ku e pèrmitnan i ta kuminsá ku e planeamentu di esei mesora.

Beeld © JoniIsraeli.com

Finansa….

 

E organisashon ta haña algu di supsidio di gemeente Rotterdam pasobra e karnaval ta nifiká hopi pa e siudat aki. E ta di gran nifikashon pa empresanan pero tambe e ta un atrakshon pa hendenan bin e siudat. I ta konta riba kasi 1 mion hende ku ta bai wak e karnaval na Rotterdam i esei ta algu positivo pa nan. I e sobrá parti finansiero tin di buska ku spònsernan. E parti di spònser no ta asina fásil segun Karel.

 

Parada 5.5 kilometer

 

E ruta di e karnaval ta 5,5 kilometer pero e parada tambe ta 2.5 kilometer. E ta bai hopi poko poko, tur hende ta kana trankil. E ta sali 1 or di mèrdia i pa e promé grupo yega na mas òf ménos 5 ora. E parti di seguridat segun Karel ta bai di e siguiente manera; tin kaminda ta pone e hèkinan pero tin kaminda e no ta yuda pasobra e hendenan ke baila den e gruponan. Tin di tene kuenta den bògtnan kaminda trùknan tin di bira, pa tene e hendenan for di kaya ya ku e ta peligroso.

 

Ruta adaptá….

For di aña pasࢱ segun Karel nan tin un ruta kambiá pasobra e kaya prinsipal di Rotterdam ta será pa 3 aña largu i p’esei mester a kambia e ruta for di aña pasá. No ta pasa einan pero tòg e ruta ta meskos. Ta kuminsá den sentro di siudat mes. Mitar di e ruta ta meskos i e sobra mitar a kambia un tiki.

 

Nunka den karnaval…

 

Remarkabel ta ku Karel ta presidente di e un organisashon di karnaval pero nunka e mes a baila den un grupo di karnaval. Komo presidente e ta responsabel pa tur loke ta sosodé e dia ei No solamente pa e karnaval pero tambe ku komisario di polis.

 

Na un okashon mester a para e karnaval dos aña pasá debí na tormenta. E tabata un situashon difísil pa Karel mes a tuma e desishon ei. El a tuma e desishon mardugá promé ku e hendenan a basha bai Rotterdam. E ta kòrda e dia ei kon nan hèkinan tabata asta bula den laira den e tormenta aki.

 

Wikènt di selebrashon….

Banda di e parada di karnaval, tambe tin shou promé i despues di e parada. Dia 26 di yüli e aña aki tin un podio grandi den sentro di siudat i einan ta presentá artistanan di Ulanda mes i di eksterior. Djabièrnè tin e ‘battle òf drums’ kaminda brassbandnan ta lucha pa bira esun number unu pa aña. Promé ku e evento tin míles i míles i hende den siudat i p’esei mester tene e hendenan bezig promé ku karnaval kuminsá. I despues di parada ku tantu hende den siudat i promé nan por bai nan kas ta entretené e hendenan. Despues di karnaval niun hende ke bai kas.

 

Beeld © JoniIsraeli.com
Beeld © JoniIsraeli.com
Beeld © JoniIsraeli.com
Beeld © JoniIsraeli.com

Pa promé biaha e organisashon di karnaval di Ulanda lo bai tuma parti na e karnaval na Fransia tambe. Esaki lo ta kuminsamentu di yüli promé ku esun di Ulanda. I esun di Inglatera ta na ougùstùs.

 

 

LAGA UN KOMENTARIO

Please enter your comment!
Please enter your name here