WILLEMSTAD.- Despues di tres dia intensivo di trabou, finalmente a destruí un kantidat di 29.330 kilo di diferente produkto ku a pasa fecha. Ta trata di produktonan di e kompania Livoni Agencies ku ta keda den Amerikanenkamp.

Riba e promé dia di kontrol ku a tuma lugá djamars, e funshonarionan a topa ku no ménos ku 4600 kilo di diferente produkto pero ku ya a pasa fecha. Mirando e kantidat di produktonan kaduká ku a haña na e agensia riba e promé dia MEO huntu ku GMN a yega na e akuerdo ku lo bai kontrolá delaster un huki di e agensia aki. Esta nan frizer kompletu i tur kaminda.

Kontinuando ku e kontrol riba djárason, e funshonarionan a haña 5730 kilo di produktonan kaduká manera e.o diferente tipo di pan, eiskrim, pasapalu, i hopi mas.

Komo sifuera no ta basta, riba e último dia di kontrol ku a tuma lugá ayera, e funshonarionan a haña mas tantu produkto ku a pasa fecha ku e dos dianan anterior. A haña total 19 mil kilo di produktonan ku a pasa fecha ayera so. Esaki ta algu ku nunka e tim di kontrol  a yega di topa kuné. Manera tabata e kaso e dos dianan anterior, a destruí tur e produktonan miéntras ku awor lo kana e kamindanan pa por atendé ku e doño.

Segun Hefe di Departamento di Inspekshon Ekonómiko Ronny Cornelis, awor aki lo bai terminá ku e rapòrt final pa asina por entreg’é na esnan konserní ku lo sigui kana e kamindanan.

Ta pendiente pa por haña lista di tur e klientenan di e agensia aki pa asina por bai kontrolá nan tambe.

Propietario a pidi despensa

Durante e kontrol ayera, e propietario mes a manda yama miembronan di prensa pa asina e por ofresé un diskulpa.

El a indiká di ta aseptá ku e tabata robes i ta pidi tantu Gobièrnu di Kòrsou, Minister di Desaroyo Ekonómiko i tambe komunidat en general despensa.

Tambe el a indiká ku esaki lo no ripití.

LAGA UN KOMENTARIO

Please enter your comment!
Please enter your name here