WILLEMSTAD.-E kompania di gobièrnu RdK ku despues a kambia di nòmber i bira 2Bays a kaba aña 2025 ku un saldo positivo di 2 mion, banda di gastunan di 78 mion, asina promé minister Gilmar Pisas a duna di konosé na Parlamento. E cashflow di 2Bays tabatin 80 mion na entrada.
For di dos mitar di 2026 por mira ku ta almasena produkto na Bullenbaai i ta pronostiká ku e aktividatnan aki ta sigui pa asina generá mas entrada pa 2Bays.
Miembro di Parlamento sra. McWilliam a puntra kon ta pará ku e kuentanan anual di RdK pasobra ya ta 4 aña kaba ku Parlamento no a mira un kuenta anual di RdK. Sr. Pisas a bisa ku ta trata e asuntu di kuentanan anual den Konseho di Minister i posiblemente e siman aki mes.
Tambe promé minister a duna di konosé ku Bullenbaai tin basta tanki ku no ta den kondishon, pero asina mes hasiendo uso di loke ta posibel 2Bays ta produsiendo bon entrada di alrededor di 8 mion dòler den e promé seis lunanan di 2026. Echo ta ku pa drecha un tanki ta kosta alrededor di 5 mion dòler. Eseinan no a sosodé tempu ku Oryx/Vigor a drenta.
