DEN HAAG/W’STAD.- Tweede Kamer na Hulanda a bai di akuerdo ku un moshon presenta pa e parlamentario Peter van Haasen pa no oumentá “tax” riba buelonan entre Hulanda i e partinan Karibense di Reino. Esei EXTRA por a komprondé for di un deklarashon di Minister Plenipotensiario stashoná na Hulanda, sr. Carlson Manuel. E mandatario a partisipá ku e moshon ei a keda akseptá manera van Haasen a present’é i a felisitá pueblo di Kòrsou ku esaki ya ku ta algu ku el a bin ta oponé pa basta tempu kaba.
T’asina ku e miembro di 2de Kamer, Peter van Haasen di partido PVV, siman pasá a hasi un apelashon serio riba e órgano aki pa introdukshon di e rekargo pa buelo (tax) ku e gabinete aki ke introdusí entrante 1 di yanüari 2027 no konta pa buelonan den e parti Karibense den Reino. Pa pone seriedat tras di su petishon sr. van Haasen a entregá un moshon.
Den un debate riba desaroyo ekonómiko na e seis islanan Karibense, van Haasen a deklará ku e ta hopi kontentu pa e diversifikashon ku tin pa por hasi e islanan mas independiente, aunke nan ta hopi dependiente ainda di turismo. Pero e miembro di PVV ta teme ku subida di rekargo pa buelo lo por tin konsekuensianan ekonómiko grandi pa e islanan.
Van Haasen a duna di konosé ku buelonan pagabel ta di vital importansia pa e desaroyo ekonómiko i sosial di tur e seis islanan. El a referí na Fransia por ehèmpel unda no ta kobra belasting riba buelonan ultramar.
Den su moshon van Haasen a pidi e gabinete pa den trahamentu di e lei aki di rekargo riba buelonan, pa hasi un eksepshon pa buelonan for di i pa e partinan Karibense den Reino. E Sekretario di Estado pa Relashonnan den Reino, Zsolt Szabó a disidí e momentu ei ku e lo laga e desishon riba e moshon den man di parlamento, ku a debatí ariba ayera.
