DEN HAAG.- 2de Kamer di Hulanda, no opstante su dudanan e sentido dje paso aki, no tabatin otro alternativa sino di duna su bendishon na e tratado fiskal entre Kòrsou i e repúblika di San Marino. E siman ku a pasa despues di un trayekto di debate 2de Kamer a bai di akuerdo ku e tratado. Sinembargo gobièrnu di Kòrsou ta konvensí ku e tratado aki ku San Marino, ku ta un estado Italiano, lo promové komersio entre nan dos. Hulanda ta kere ku un relashon komersial manera esaki ku tin un balor kalkulá na un XCg. 85.000.- pa aña lo no nifiká muchu i no ta spera ku esei lo no krese tampoko. Kòrsou ta mira esaki, ya ku a lo ménos mester a pone e base pa por sigui konstruí riba dje.
E lei ku ta mará na esaki, pues e tratado ku ta nesesario ya ku asuntunan di eksterior ta un asuntu di Reino, ta algu ku a ser akseptá pa aklamashon den 2de Kamer. I teniendo kuenta ku no a mira nesesidat di hiba un debate, no tabata nesesario tampoko pa henter un delegashon parlamentario di Kòrsou a bula pa Hulanda.
T’asina ku den e mundu polítiko na Den Haag ta surgi e pregunta dikon Kòrsou ke sera tratadonan fiskal ku paisnan ku a keda deklará di tin un reputashon dudoso riba tereno di impuesto i ku pa loke ta nan potensial ekonómiko no tin nada di ofresé ku no ta di kompartí e konosementu kon pa fasilitá evashon di belasting i labamentu di plaka. Tin e tratado ku Malta, i pa loke ta e dudanan pa ku Malta, for di Den Haag tabatin di bisa ku e isla aki meskos ku Kòrsou, ta ser konsiderá komo un teritorio sigur pa hopi operashon di kompanianan ku ta aktivo ku weganan ònlain ilegal. Pero tempu ku dia lo mustra si ta asina, ya ku e parti di legislashon ku gobièrnu di Kòrsou a traha riba dje ta papia palabra kla, miéntras ku Minister di Finansa a duna di konosé públikamente kaba ku na Kòrsou no tin espasio pa esnan ku tin pensá pa usa e hurisprudensia aki pa aktividatnan kriminal.
