Mc William ta kuestioná
WILLEMSTAD.- Awor ku morto a kai i faltando solamente 3 luna pa elekshon, gobièrnu ta anunsiá ku e ta bini ku un maneho pa atendé ku e desòrdu den tráfiko na Kòrsou. Un situashon kaótiko ku ya pa algun aña kaba por tuma nota di dje. Kon serio pueblo por tuma e gobièrnu aki, ku a sinta 4 aña wak e desòrdu tuma lugá i bira tur dia mas pió, sin ku a hasi nada kontra esaki, Lider polítiko MAN-PIN, Giselle Mc William ta deklará pa EXTRA.
Kantidat grandi di aksidente riba kareteranan di Kòrsou i mal komportashon di outomobilistanan pa algun aña ta krea situashonnan peligroso den tráfiko i e situashon ta bai ‘de mal en peor’, Mc William ta bisa. “No opstante esaki, gabinete Pisas II a skohe pa no hiba un maneho ku man duru kontra e situashon di desòrdu aki. Ta di lamentá ku gabinete Pisas II a tolerá un situashon insigur den tráfiko durante nan periodo kompletu di gobernashon.”
Mc William ta sigui bisa ku por mira e desórden den tráfiko den un kantidat grandi di infrakshon ku ta kometé kontra lei i regla. “For di butamentu di ‘fever’ te pasamentu den lus kòrá pa loko. Kore outo sin paga impuesto òf sin karchi di kùr bálido a bira algu masha normal i tolerá pa e gabinete Pisas.”
Minister di Finansa, Javier Silvania tambe tin ku karga su responsabilidat den evitá e desòrdu i sòru ku ta emití plachinan di number nobo di otro koló pa asina yuda ku por hiba un mihó kontròl, Mc William ta bisa mas aleu. “Esaki a base di maneho di èks minister Kenneth Gijsbertha ku lo kosta 3 mion florin. Ironia ta sinembargo ku minister Silvania ta skohe pa keda usa e mesun plachi di number blanku ku ta usando for di 2009 i asina skohe pa mantené e desòrdu eksistente.”
E parlamentario ta konvensí ku ta e komportashon aki di esnan ku ta skohe pa no kumpli ku leinan di pais, ta sòru pa aksidentenan ku ta kosta bida di hende òf leshon serio ku ta afektá bida diario di hende pa semper. “Esaki ta sin menshoná e gastunan ku e aksidentenan aki ta hinka e outomobilistanan, ku si ta sòru pa kumpli ku regla aden.” Pa Mc William ta inkomprendibel ku minister, Shalten Hato no por a hasi e situashon di desòrdu den tráfiko un prioridat durante su periodo komo e outoridat máksimo di hustisia.
Foto:
…Giselle Mc William…
