3 polis di Aruba detené òf bou investigashon

A hòrta portofon di polis

ORANJESTAD.- Un ratu pasá Kuerpo Polisial di Aruba pa medio di su bosero a informá ku den kuadro di un investigashon interno a prohibí entrada awe djamars 30 di òktober na e agente polisial K.G.R. E agente no tin outorisashon pa drenta niun warda di polis.

Polis di Aruba ta para pa seguridat, servisio, integridat, vigilansia y disponibilidat. E pueblo mester por sinti su mes sigur y mester por konta ku e ekspertisio, ayudo profeshonal y e profesionalismo di nos organisashon Polisial.

EXTRA por indiká ku esaki ta di tres polis ku sea a keda detené òf t abou di investigashon pa kua a prohibí nan entrada na wardanan di polis. Tambe por a komprondé ku e kaso posiblemente lo tin di haber ku un radio di polis ku a ‘pèrdè’. EXTRA por a komprondé ku a listra den vários kas na Aruba i a konfiská un portofon, pero no ta ekskluí mas detenshon pasobra e investigashon ta sigui.

Resientemente EXTRA a informá ku na e momentunan aki Ministerio Públiko di Aruba ta atendiendo investigashon riba kasonan ku ta trata posibel embolbimentu di agentenan polisial den un kaso delikado. Ta asina ku algun dia pasá Kuerpo Polisial di Aruba a konfirmá ku a prohibí entrada na e agente di inisial P.A.K.G. i mas despues a hasi detenshon di e agente polisial S.L.M.U.

Kuerpo Polisial ta mustra ku pueblo mester por sinti su mes sigur i mester por konta ku e ekspertisio, ayudo profeshonal i e profesionalismo di e organisashon polisial. Pa loke ta trata e detenshon kuerpo polisial di Aruba a indiká ku ta den kuadro den un investigashon interno a detené e agente polisial S.L.M.U.