35 detenshon durante di Gran Marcha

WILLEMSTAD.- Djadumingu durante di e operashonnan riba e dia di Gran Marcha,  Kuerpo Polisial Kòrsou, VKC(Vrijwilligers Korps Curaçao i Curmil(Curaçaosche Militie) a traha huntu pa loke ta órden públiko, seguridat general i seguridat di tráfiko.

Durante di Gran Marcha tabatin diferente aktividat ku outoridatnan a haña nan mes ta atendé kuné.

Kontròl preventivo

Segun ordenansa nashonal 2006 Ministerio Públiko por indiká un área na unda polis por buska arma ilegal di forma dirigí.

En konekshon ku esaki outoridatnan a hasi kontròl preventivo riba persona(nan) riba e ruta i den e área di aktividatnan di karnaval. Outoridatnan a hasi kontròl preventivo riba 170 persona (150 hòmber i 20 hende muhé) den e área di karnaval ariba menshoná.

Detenshon

Outoridatnan a hasi trintisinku(35) detenshon. Polis a detené diesun(11) persona pa posishon di droga; seis(6) persona pa menasa; dos(2) persona pa menasa i pa motibu ku nan no por a presentá un identifikashon; un(1) persona pa maltrato; sinku(5) persona pa motibu di resistí aresto, opstrukshon i no sigui òrdu di outoridat.

Tambe a hasi detenshon di un(1) persona (shofùr) di vehíkulo pa motibu  ku su dokumentonan no tabata na òrdu i e no tabatin hèlm bistí; sinku(5) persona pa motibu ku nan no tabatin e dokumentonan nesesario di e vehíkulo òf no ta den posishon di un reibeweis; dos(2) persona pa posishon di un arma(no arma di kandela); un(1) persona pa buracheria públiko i un(1) persona pa motibu ku nan no por a presentá un identifikashon bálido.

E proyekto ‘aktua robes,  sinti’é un bes’ ta kanando hopi bon.

Vehíkulonan ku a falta ku regla

A transportá un kantidat di 8 vehíkulo ku tabata mal pará òf ku tabata opstakulisá tráfiko na diferente sitio riba e ruta. Esaki ta trese un situashon di peliger espesialmente ora e instansianan ku tin ku duna asistensia urgente tin ku pasa bai.

A tou e vehíkulonan aki ku kran.

Despues ku shofùr di e vehíkulonan aki a paga e kran partikular, nan por a bai ku nan vehíkulo. Doño/shofùr di 7 vehíkulo a presentá pa tuma nan propiedat despues ku nan a paga e kran partikular.

Otro kaso

Dos(2) persona a bira malu i personal di Krus Kòrá a atendé ku nan.

Tambe polis mester a atendé ku un kaso di bringamentu ku a tuma lugá den área di Weg naar Welgelegen.

Kontròl di e Departamento di pèrmit di Kuerpo Polisial

E Departamento di pèrmit di Kuerpo Polisial huntu ku MEO, GMN i Brantwer a tene kòntròl na 66 establesimentu di ‘horeca’, 47 lugá kaminda e hendenan ta para bende kos i 6 persona ku ta kana bende kos riba kaminda públiko.

Total a sera kuater(4) establesimentu huntu ku MEO ku a atendé ku pèrmit ku no ta na òrdu i GMN a atendé ku falta di higiena.

Outoridatnan a konfiská un kaha di serbes Heineken ku mansa di pan aden i tambe un bòter di wiski.

SHARE

LEAVE A REPLY