STILFONTEINR, Suráfrika (AFP).- Mas di 20 minero klandestino a keda reskatá i 36 kurpa rekuperá for di un mina di oro bandoná den Suráfrika for di despues ku djaluna último a kuminsá ku operashonnan di reskate.

Un empresa di reskate minero a sòru pa e materialnan nesesario na e sitio serka di Stilfontein, mas o ménos 150 km zùitwèst di Johannesburg. E operashon di reskate lo dura sigur dies dia.

Te ku ayera no tabata konosí kuantu hende ta den e pos di kasi 2 km di profundidat, pero segun polis por ta trata di algun shen hende.

Nuebe kadaver a keda saká na un promé instante, sigui despues pa otro 27. Tambe tin un kantidat di minero kendenan a logra sali, pero ta den kondishon hopi débil.

E akseso na e mina ta blòkiá pa polis ya pa algun luna, ku e intenshon pa arestá tur e mineronan klandestino. E “zamas zamas” (den zulu: “esnan ku ta purba”) ta bini hopi biaha di otro paisnan pa traha den minanan sin pèrmit den Suráfrika.

Nan aktividatnan ta kai den mal tera serka tantu empresanan minero komo habitantenan lokal, ya ku hopi di nan ta enbolbí den delinkuensia.

Outoridatnan a keda akusá di a purba na obligá e mineronan pa bin bèk riba tera i a hasi esei dor di redusí for di novèmber e suministro di alimentashon i awa den e region.

Gobièrnu djaluna a deklará ku nan a detené mas di 1.000 persona enbolbí den aktividat minero ilegal den e zona.

LAGA UN KOMENTARIO

Please enter your comment!
Please enter your name here