ILLEMSTAD.- Di 3 edishon di Curaçao Sport Ambassador Award dediká na nos deportistanan ku ta aktivo riba plano internashonal, a tuma lugá ayera nochi na Hotel Renaissance. Flamante Promé Minister Hensley Koeiman tabata presente, meskos tambe Minister Kenneth Gijsbertha kendenan dje forma ei a hasi nan promé aparishon ofisial na un aktividat di deporte.
E anochi tabata dediká na Andruw Jones, kende no ta na Kòrsou i a keda representá pa su ruman muhé.
Direktor di FDDK, Thakai Doran, a referí n’e echo ku den apénas 3 aña di tempu e premiashon aki a krese. E promé aña tabata algu “chikí”, pero ya for di aña pasá por a mira e kresementu. Doran a sigui bisa di ta konsiente dje echo ku mester mehorá i amplia e kriteria a bini na remarká pa e ‘award’ por sigui krese.
Refiriendo na kresementu, el a trese dilanti ku awor si mester pensa serio riba un ‘high performance center’ aki na Kòrsou, pa ora ku nos deportistanan profeshonal tei i ku nan ke train, meskos tambe otro profeshonalnan ku por skohe pa hiba parti di nan preparashon na Kòrsou sin nos por ofresé tal fasilidat.
Algu impreshonante:
Promé Minister Koeiman, kende basta resien tabata presidente di Federashon di Atletismo (CAB) a referí na e kantidat di deportista di taya internashonal ku Kòrsou a produsí, siendo un isla di apénas 150.000 habitante. Di e kantidat ei, tin hopi ku pa un òf otro motibu no ta(bata) aktivo den deporte, pues for di un grupo aun mas chikitu ta surgi yunan di Kòrsou ku ta presta riba nivel hopi haltu. “Nos mester ta konsiente ku ta algu no normal ku un komunidat asina chikitu ta presta asina haltu. “E dushi ta ku tòg hopi di esnan ku ta presta ta keda humilde i hopi di nan ta keda kòrda ku nan a haña yudansa pa yega kaminda nan ta, sea ta yudansa di mayornan, trainer, spònser, etc.”
Sinembargo, manera e mandatario a agregá, tambe tin hopi deportista ku pa motibu di un plataforma di preparashon no adekuá a keda kòrtiku. “Gobièrnu, i esaki ta inkluí oposishon, mester kontribuí pa evitá ku e grupo ku no ta logra lo sigui krese”, segun Promé Minister Koeiman a asentuá.
Finalmente a pasa pa e premiashon i esaki a bai dje siguiente manera:
Premio Rilleyson Ignacio, dediká na memoria di e hóben studiante/ pelotero ku a fayesé den aksidente na Merka: Ganadó femenino Sharienne Ricardo (tènis) miéntras ku e premio maskulino a bai pa Trinity Christian Academy, risibí pa Keanu Irausquin.
Premio pa studiante/ deportista femenino na Merka: Philny Lllewellyn (sòftbòl).
Premio pa studiante/ deportista maskulino na Merka: Aldrich de Jongh (beisbòl).
Premio pa Deporte General: Churandy Martina (atletismo).
Premio pa beisbòl amatùr i liganan profeshonal (no MLB): Curt Smith.
Premio futbòl profeshonal i amatùr: Shanon Camelia.
Premio Minor League Baseball: Ozhaino Albies.
Premio pa futbòl profeshonal: Joshua Brenet.
Premio pa pelotero MLB: Kenley Jansen.
