MARACAY, VENEZEULA (AFP).- Kuater agente di seguridat a keda detené na Venezuela despues ku outoridatnan a tuma kontròl dje prizòn di Tocorón, sentro di operashon di Tren de Aragua, banda kriminal ku ta operá den vários pais di Amérika Latina.
E prizòn a keda okupá pa 11.000 efektivo polisial i militar, apoyá pa tankinan i vehíkulonan blindá.
“Lo no tin impunidat. Nos ta bai kontra di tur e kriminalnan i nan kómplisenan”, segun e Minister di Interior i Hustisia, general Remigio Ceballos, relashoná ku e funshonarionan akusá di ta kómplise dje delinkuentenan i kendenan durante di vários aña tabatin kontròl dje prizòn.
“Tabata un operashon eksitoso, impekabel, ku a permití nos dal e kriminalnan un gòlpi fuerte”, segun e minister. E prizòn ta konta ku un pisina, vèlt di beisbòl, parke di bestia i te hasta un luhoso diskotèk.
