Akshon: “Entreg’é of Nos ta Bin Busk’é”
ORANJESTAD.- Polis di Aruba ta informá ku e akshon kontra di arma di kandela a duna fruta. Ta trata di un akshon konhuntamente ku Ministerio Públiko. Manera a keda informá anteriormente polis di OM a tene e akshon for di 24 di mart te 24 di mei 2026. Tabatin oportunidat pa hendenan ku tin un arma ilegal pa nan entrega esaki, i tambe munishon. Tabatin kònteinernan blou situá na San Nicolas i tambe na Oranjestad unda por a depositá e armanan ilegal.
Durante e kampaña “Entreg’é òf Nos ta Bin Busk’é”, hendenan a depositá un total di 3 arma di kandela i 359 bala kayente, den e kònteinernan blou. E armanan tabata entre otro; un Beretta di 9mm, un Winchester 255, i un Colt 38. Loke ta munishon tabata 5 bala di 9mm, 332 bala .22(kaliber), i 22 bala .38(kaliber).
Pa loke ta trata e kombatimentu di poseshon di arma di kandela ilegal atraves di investigashon polisial, a base di dato di Ministerio Públiko for di 1 desèmber 2025 te ku 29 mei 2026 e sifranan ta lo siguiente; A detené 40 sospechoso a konfiská 13 arma di kandela, di kua 2 tabata traha ku 3D printer.
Di e 40 sospechosonan 9 a risibí kastigu. E sobra sospechosonan ta wardando nan kaso bin dilanti den korte. E tempu pa entrega arma di kandela boluntariamente a pasa. Awor lo sigui kombatí poseshon ilisito di arma di kandela severamente i ta pasa pa e siguiente fase di “Nos ta bin busk’é”.
