CARACAS, VENEZUELA, AFP.- Mas di 40 persona a keda detené den último simannan na Venezuela den u krusada antikorupshon den e kompania petrolero estatal PdVSA i otro empresanan públiko.
“Te ku awe ministerio públiko a logra huntu ku otro órganonan, detenshon di 42 persona vinkulá den diferente forma di korupshon ku a buska moda di engañá e ekonomia nashonal”, asina fiskal general Tarek William Saab a bisa riba su kuenta di Twitter.
E arestonan a kuminsá djabièrnè 17 di mart despues di un komunikado emití pa polis nashonal anti korupshon, un órgano ku ta aktua bou di reserva estrikto, ku a pidi ministerio públiko pa prosesá hudisialmente kontra e funshonarionan ku por ta metí den echonan di korupshon i malversashon di fondonan”.
E fiskal a konfirmá ayera ku Pedro Maldonado, presidente di e korporashon venezolano di Guayana CVG ta figura entre e detenidonan nobo, meskos ku Nestor Astudillo presidente di Siderurgika di Orinoco Sidor.
Tambe a keda arestá Edgar Sanchez vise presidente di Planifikashon di CVG, Felipe Contreras vise presidente di Hierro i Acero, Lino Mora vise presidente ehekutivo, Tulio Medina vise presidente di finansa i Carlos Moreno gerente di tráfiko i duana di e korporashon enkargá ku eksplotashon di heru, bouksit, oro, djamanta i otro materialnan stratégiko.
