ABACO, BAHAMAS, AP.- Ekiponan di búskeda i reskate no a logra yega na algun komunidat di Bahamas, kual ainda ta aislá pa e inundashonnan i ruina despues ku orkan Dorian a pasa. E kantidat ofisial di morto a subi na 43 i ta probabel ku esaki ta sigui subi, segun informashon di outoridat.
Promé minister Hubert Minnis a bisa djabièrnè anochi ku tabatin 35 morto riba isla Abaco i ocho mas na Gran Bahama. “Tin hopi hende pèrdí i por spera ku e kantidat di morto ta oumentá signifikativamente”, asina el a bisa. “Esaki ta un di e realidatnan ku nos mester enfrentá durante e tempunan difísil aki”.
E minister di seguridat, Marvin Dames, a splika ku outoridat ta hasiendo tur su esfuerso pa yega na otro partinan di e isla pero a agregá ku e ekiponan di reskate no por habri kaminda i kuminsá kita ruina dor ku ainda tin kadaver ku no a keda rekuperá.
“Nos a pasa dor di e kos aki kaba, pero no ku e nivel di ruina aki”, asina Dames a bisa. “Nos ta pasando dor di un momentu delikado i grave”.
Ounke el a bisa ku e ta komprondé esnan ku ta reklamá pa haña yudansa despues ku Dorian a afektá nan bida, e funshonario a pidi pa tene un tiki pasenshi ku outoridat.
