WASHINGTON, MERKA, AFP.- Un hòmber di Arkansas a wòrdu fotografiá ku su pianan riba eskritorio di ofisina di e presidente di Kámara di Representante, Nancy Pelosi, despues ku el a uni e hendenan ku a asaltá Capitol na Merka na aña 2021. El a keda sentensiá na kuater aña i mei den prizòn djárason.
Richard Barnett di 63 aña, tabata sintá den ofisina di e polítiko demókrata riba un stul ku su sapatunan riba eskritorio di Pelosi, na momentu ku un fotógrafo di AFP a saka su potrèt.
E potrèt a bira un di esnan di mas viral den e insurekshon di 6 di yanüari 2021.
Barnett a uni partidarionan di eks presidente Donald Trump pa para e sertifikashon di Joe Biden komo presidente di Merka.
Un hurado di Washington a kondená Barnett ku opstrukshon di sertifikashon di elekshon den Kongreso, entrada ilegal den Capitol i alterashon di òrdu públiko ku un arma peligroso entre otro.
Fiskalnan a pidi hues Christopher Cooper un sentensia di shete aña di prizòn. E fiskalnan a bisa ku Barnett no a mustra niun remordimentu i ku el a asta purba probechá di su kondukta kriminal dor di bende potrètnan di su mes den e ofisina di Pelosi.
