45 aniversario Selebrashon Fiesta di Seú

WILLEMSTAD.- Fundashon Kultural Seú Kòrsou ta kla pa selebrashon di e di 45 aniversario di Fiesta di Seú.
Lionel Jansen presidente di FKSK a indiká den su diskurso ku ‘Pa 45 aña, nos ta selebrá nos fiesta di Seú den era nobo.
Ta importante pa nos ta konsiente ku nos kultura ta bibu i p’esei e ta desaroyá ku tempu.
Esensial den esaki ta pa tene bon kuenta ku historia, folklor, aspektonan sosial i spiritual, den nos tarea pa sigui konsientisá i eduká nos komunidat.
Nos músika, kanto, baile, trahe, artefakto i kustumber ta komponentenan di nos kultura, ku a pasa den un desaroyo ku ta di aploudí.
Spesialmente nos hóbennan mester siña konosé esensia di nos Seú, komo un fiesta di gradisimentu na Señor pa e kosecha di aña.
Mará na e kosecha aki tabatin hopi kustumber ku ta siña nos norma i balornan di ántes, ku ta meresé atenshon spesial i práktika den nos tempu moderno.
Nos historia ta e úniko forma pa traspasá dicho norma i balornan.
Si bo konosé bo historia bon, bo ta komprondé bo mes i bo pueblo mihó, pa bo por aportá grandemente na nos desaroyo positivo. Ban gosa i selebrá nos fiesta di Seú den un forma liber ku e informashon aki presente den bo mente’, sr. Jansen a terminá bisando.

Kordinadónan di aktividat
Ayera tardi FKSK a anunsiá tambe ken ta e kordinadónan pa loke ta trata diferente di eventonan ku lo keda organisá e aña aki.
Sr. Alex Molina lo tin na su enkargo e kordinashon di ‘Apertura di Seú 2019’; Shurendi Pieternella ta e kordinadó di tayer di Mara Lensu; Erickson Vicario ta kordinadó di Elekshon Reina di Seú; Melissa Rosalina ta kordinadó di Elekshon di Rei i Reina Kultural, Swinda Albertus ta kordinadó di Elekshon Wela Seú i Dino Serbonij ta kordinadó di Presentashon di Trahe.

SHARE

LEAVE A REPLY