QUITO, ECUADOR, AP.- un grupo di 46 kubano a keda deportá djaluna pa Ecuador kual ta subi e kantidat di siudadanonan kubano repatriá na 75. Esaki a kuminsá desde fin di siman despues ku durante tres siman tabatin protestanan na Quito reklamando yudansa pa yega Merka.
Den un komunikado, Ministerio di Interior a informá ku “un total di 31 hòmber i 15 muhé no a logra hustifiká su status migratorio den e pais. Nan ta suma e 29 siudadanonan kubano ku a keda deportá dia 8 di yüli pa no hustifiká su permanensia legal den Ecuador”.
E último grupo sali djaluna mainta desde e aeropuerto di Tababela di Quito i durante e proseso di deportashon “a respetá su derechonan humano i a konfirmá e bon estado di salú di kada un di e estranheronan”.
Jose Miguel Vibanco, direktor ehekutivo pa Amérika, di Human Rights Watch, a komentá ku ” gobièrnu ekuatoriano tin e obligashon hurídiko intenshonal di respetá un prinsipio. Esaki ta indiká ku nan no por debolbé refugiadonan na un sitio kaminda nan bida òf libertat ta wòrdu menasá”.
El a agregá tambe ku mester kumpli ku e prinsipionan básiko di e debido proseso i permití e solisitantenan di refugio pa nan kaso ta unu hustu i debidamente konsiderá. Kualkier medida ku ta no ta kuadra ku e obligashonnan aki ta violá derechonan fundamental i mester keda fuertemente kondená pa e gobièrnunan den region, representashon di Organisashon di Nashon Uní na Quito i ofisina di Komishon di Nashon Uní pa refugiadonan.
